吳卓羲郭晉安歐陽震華內地直播跳《晚安大小姐》 舞步嚴重唔齊 網民感嘆︰虐待中老年人

人人都話藝人北上掘金好搵，實情係點？早排幾位前TVB男藝人吳卓羲、郭晉安、歐陽震華、王浩信埋高鈞賢，一齊參與內地網上直播節目，其中一個環節係5位男星跳舞，仲係跳hit過好一陣子嘅《晚安大小姐》 。

5位男星當中3位係視帝，但係跳舞……似乎只有dancer出身嘅吳卓羲比較有板有眼，其餘各人舞步唔齊甚至根本唔知跳乜，成個畫面都有濃濃嘅尷尬感。尤其係目光呆滯嘅郭晉安、近乎跟唔到嘅歐陽震華……

喺另一條片，同一造型嘅吳卓羲同王浩信相信喺同一個節目度一對一跳舞battle，以爭取網民投票支持。呢個環節簡直開正吳卓羲嗰瓣，solo跳舞無難度，反觀王浩信就真係得個企字。

做嘅做得突兀，睇嘅觀眾都唔太好受，有人喺5位男星跳舞條片度留言，直指安排係「虐待中老年人」、「何事落得這下場」。都係嘅，最後生嘅高鈞賢都41歲，歐陽震華更加係64歲……亦有人見到吳卓羲同王浩信跳舞就話「看著小時候的男神這樣做直播很心酸」。