小紅書流傳5萬蚊人仔接內地商演港星名單 前TVB男一同綠葉都係呢個價位

香港藝人北上搵真銀據聞好好賺，但係環境唔同演出形式多，到底港星北上做商演係咩價位？

內地社交平台小紅書近日有文章流傳，以5萬蚊人民幣左右嘅budget可以請到邊啲港星，多位由TVB出身嘅藝人都榜上有名。早前因為拍片食牛癟食到面有難色而爆紅嘅前TVB綠葉王李國麟，因為多年來拍過無數大台劇集，喺內地有一定知名度。李國麟都係「5萬蚊名單」其中一員，難怪有網民話抵用！

不過根據該份名單，原來曾經係TVB一線小生嘅陳錦鴻，商演價同樣係5萬人仔，咁似乎比李國麟更具成本效益。另外出現喺名單之上嘅仲有前港姐梁小冰、八十年代型男鄭浩南、一度被雜誌寫衰而出外發展嘅劉錫明等。假如名單資料屬實，似乎喺八九十年代有一定知名度嘅資深藝人，即使名氣不及一線阿哥阿姐，喺內地都可以密食當三番。當然，做過TVB更加有著數。

嗱，戴個頭盔先，「5萬蚊名單」係小紅書流傳，幾成真幾成假大家心裡有數。