F1中國站精讀：法拉利又自爆

咸美頓本來今站同預期一樣，衝刺賽取得勝利，不過呢個時候，戰術大師法拉利竟然又玩自爆。

正賽以第六名完成賽事嘅「咸爺」咸美頓，因為戰車底板違規，被FIA取消資格。取得第五名嘅隊友陸克萊，就因為戰車比最低車重800公斤輕咗1公斤，亦同樣被取消資格。

結果七屆世界冠軍咸爺今季兩站只得9分，令人慨嘆。

麥拿倫又包Q

上星期五嘅前瞻都有提到上海國際賽車場天氣清爽，將有利麥拿倫車隊發揮，優勢會更加明顯。

雖然平治嘅羅素曾經喺一停嘅時候追貼過兩部麥拿倫戰車，但係羅利斯幾個圈之後就成功反超。

值得一提嘅係奧斯卡今站表現出色，同上年匈牙利站同阿塞拜彊站一樣完全控制戰局。睇嚟季初麥拿倫車隊將會有排威。兩位車手嘅內鬥將會相當有趣。

中游大混戰

進入中國站之前，Willams車隊本來只係以兩分領先Aston Martin，而Racing Bulls嘅赫查同角田裕毅今站排位賽拎到前十位，令到佢哋喺車隊排名上有機會反壓Sauber、Aston Martin同埋Williams。

不過今站Williams車隊戰術運用恰當！當其他車手要入Pit換胎嘅時候，容許阿邦堅持到最後一刻喺第21個圈左右先入Pit換胎，令佢喺法拉利兩位車手被DQ嘅情況後升上第七位完成今站賽事。

暫時Williams以17分排喺車隊榜第四位，法拉利一樣同得17分排第五位，Haas車隊14分排第六位，Aston Martin得10分排第七位。中游戰局相當混亂。

P.S. 另有傳Red Bull有意以角田裕毅取代羅臣，「韋少」韋斯塔本大表不滿。呢幾日又有大量花生食啦咁多位F1車迷