解讀 | 三獅兵團輸波 到底發生過什麼事？

英格蘭21次對賽非洲國家隊未嚐一敗，尋晚卻主場友賽以1比3不敵塞內加爾。領隊杜曹 (Thomas Tuchel) 今場友賽試陣而作出大幅輪換，縱使憑著帶隊4場比賽都有入球進帳的哈利簡尼 (Harry Kane) 先開紀錄，但之後卻連失兩球。雖然後備入替的比寧咸 (Jude Bellingham) 下半場曾一度以為成功扳平比數，但建立攻勢過程中高維 (Levi Colwill) 犯手球已被推翻。最終英軍傾巢而出之下，於補時階段再失1球，令杜曹錄得帶隊4場比賽以來的首場敗仗。

兩位老將應負全責？

由於領隊杜曹只簽了18個月合約，所以明白佢點解連續兩次國際賽周都會征召佐敦軒達臣 (Jordan Henderson) 同卡爾獲加 (Kyle Walker) 等老將入隊。不過年屆35歲的獲加，上半場表現乏善足陳，被伊斯米拿沙亞 (Ismaila Sarr) 攻入一球時顯示出預判欠佳、回防速度慢、缺乏危機意識等問題。而34歲的軒達臣對賽安道爾時及今場比賽都毫無建樹，缺乏效率。

曼城領隊哥迪奧拿 (Pep Guardiola) 一月外借獲加到AC米蘭係有原因。睇來杜曹要開放右閘位置給阿歷山大亞奴 (Trent Alexander-Arnold)，域斯占士 (Reece James) 或者利華文圖 (Tino Livramento) 等球員。

英格蘭球員壓力爆煲

杜曹提到：「我見到球員在操練嘅時候面帶笑容，但係落場比賽嘅時候就完全唔見晒笑容。證明呢件英格蘭國家隊波衫重量十足，令佢哋產生巨大壓力。」

的而且確，多位前英軍領隊都有講到呢個問題，大家都對英軍抱有太大期望，令到呢班在球會交出世界級表現的球星，著上三獅兵團嘅波衫後變得表現平平。

不過當中亦有例外，星期六對賽安道爾時馬杜亞基 (Noni Madueke) 表現突出，相當醒神，為隊友製造機會。而對賽塞內加爾時艾斯 (Eberechi Eze) 亦邊踢邊笑，既頭頂腳踢，亦有後抽傳送，更加經常後上攻門，表現得相當自在。

另外，相信杜曹要挑選球員名單及出場時間上下多點功夫，要狠心棄用老將之外，亦要為征召東尼 (Ivan Toney) 入隊，但只派佢上陣兩分鐘負上責任。