【Yahoo 新聞報道】舞獅運動員劉銳楠，花名大頭。人如其名，銳利而珍貴，也愛出風頭。

「我鍾意『搶fo（焦點）』，享受畀大家望住嘅感覺，知道全部人望住自己唔衰得，就會好易集中，玩舞獅可以完全望唔到人，但可以表露無遺咁表達自己」。

他是掹車邊00後，今年25歲，集「Gen Z」特質於一身：精力充沛，日練夜練；年少氣盛，與老師傅吵架。他從小的生活都圍繞舞獅，玩了超過20年，大頭的獅隊「弘德」將於本周六（26日）代表香港，出戰「舞獅界奧運」馬來西亞雲頂世界獅王爭霸賽。由獅頭設計到音樂編排，均融入本土元素，在世界鎂光燈下弘揚港德。

「我希望香港人會記得，我哋香港人都做到好多嘢，香港都有好多獨有嘅文化」。

「舞獅係我嘅命中注定」

大頭自 3 歲起就愛「搶fo」。出生於舞獅世家，媽媽舞的是海陸豐麒麟，舅父更開設獅藝武館，大頭與表兄弟姊妹到館中，圍住獅頭你追我逐。海陸豐麒麟表演中，闊面大口、凶神惡煞的神獸落入凡間，仙童要出場將牠勇武收服，大頭早就對仙童的角色虎視眈眈，「嗰時細個好有童真㗎嘛，覺得自己真係可以做到（收服）呢件事」。在太平清礁中做小哪咤，眼神霸氣得攻佔了報章頭版。

一生只做一件事

「我喺（媽媽）肚入面已經聽緊舞獅聲，人哋細個玩玩具車、figure（模型），我就係玩鼓車同獅頭」。

仙童轉眼變成少年，開始加入舞獅隊習武。大頭當時每天上學，就是為了待到放學練功夫、鑼鼓鑔，「放學返去就係見到啲師兄弟」。他練上癮，決定一生只做一件事，「其實屋企人無 push（強迫）過我，我覺得舞獅係我嘅命中注定」。

曾離棄舞獅一年：覺得佢好噁心

與舞獅的緣，卻於數年前因一場拗撬差點散滅。大頭曾與舞獅隊師傅就舞獅表演形式爭持不下：師傅堅守傳統，大頭年少氣盛，當然想破舊立新，「當時我唔識點樣表達自己，唔知點樣處理同佢（師傅）嘅關係，令我覺得舞獅都唔好玩嘅，有一段時間直頭覺得舞獅噁心」。

「坐唔定」的大頭曾轉戰 BMX，一次意外令他斷十字韌帶。他捲起獅毛茸茸的舞獅長褲，展示小腿那條近10厘米的手術疤痕。那時，他滿腦子想的不是自己，而是發現再受傷的話，這一輩子就不可能再重投舞獅。

「喺我放棄嗰段時間，我都有問自己係咪真係咁鍾意舞獅？其實係，我身邊所有人都係玩舞獅，我由細都係佢（舞獅）陪我大，所以無論走到去邊，當我見到舞獅，我都會記得我係劉銳楠」。

跳樁 Panic Attack 靠打坐尋回初心

一年前，大頭遇上獅隊「弘德」，學習解鎖跳梅花樁技能。相比地獅，梅花樁舞獅需兼顧樁之間的距離感、高度、動作難度變化等。大頭早於18、19歲就想踏梅花樁，但連將他「帶入行」的媽媽都極力反對，其中一句話更成為他跳樁的心魔。

「你跌咗落嚟，唯一照顧到你嘅只有我哋，你要諗埋我哋」。媽媽這句話令大頭苦思良久，「我會諗太多而唔敢去做一啲動作，反而令到成件事更加危險。因為我越驚佢，我就喺去與唔去之間插咗落去，我好多呢啲位」。

背負家人的憂慮，大頭在樁上舉步維艱。他試過因一次失誤而恐慌發作（Panic Attack），墮地後全身僵硬、飆手汗、嘔吐，全都源於對自己的失望，「本身做咗100次嘅嘢無端端做唔到，嗰陣覺得自己乜都做唔到」。他開始打坐，靈魂拷問直面恐懼，「而家係我純粹地驚咗呢個樁，但我本身係唔驚，有好多唔同因素搞到我好似好唔想做呢件事咁」。要在樁上企得穩，心思也要如腳步紮實，「我已經選擇咗呢條路，選擇咗我要跳，我就唔可以再諗咁多，再諗咁多反而個後果更加大」。

「為舞獅成為更好嘅自己」

弘德由兩位教練 Lok 哥和 Dee 哥坐陣，前者掌管獅隊的音樂編排，後者為動作指導。文武鐵漢背後總帶柔情，大頭形容兩人如獅隊的父母，「我係衝動小子嚟，做嘢唔顧後果，但佢哋係用愛融化我！」去年一場香港公開賽，大頭在樁上稍微走神隨即墮地，屬重大失誤，他自責落淚，「兩個教練衝過嚟，攬住我，話『無事，下年再嚟』」。

「我跳樁成日好多表情，攰又會大嗌，跳得唔好又會鬧自己，但佢哋會叫我沉住氣。呢個唔係淨係講緊跳樁，人生、待人處事都係，要諗清楚係咪想咁樣表達自己？我係好好彩入咗嚟弘德，因為舞獅而成為更好嘅自己」。

為港出戰「舞獅界奧運」

有準備的人，值得更大的舞台。弘德將於本周六（26日）代表香港，到馬來西亞出戰雲頂世界獅王爭霸賽。比賽於馬來西亞雲星劇場舉行，共40支隊伍參賽，來自15國家或地區，包括日本、美國、新加坡、泰國等。「雲頂爭霸賽」自1994年開辦，每兩年一屆，為舞獅界盛事之一。

「既然都去到雲頂，最緊要玩到自己嘅嘢、做到要做嘅嘢，就係我嘅最大目標」。

大頭今次擔任的是獅尾，難度更甚。「雲頂爭霸賽」比賽特色在於「王字樁」，樁的位置由上而下看來呈「王」字，「正常樁係就咁直線，王字樁多咗好多唔同角度去轉，個方向感會唔同咗」。教練 Dee 哥在編排動作時，加入不少獅尾動作，讓獅尾在樁之間盪來盪去，獅子神態活靈活現。為應付比賽，大頭與隊員每周練習至少兩三天，亦要加操體能，甚至練習呼吸，「尤其是我哋笠住條獅被，好多呼吸位都要自己控制，同埋獅尾好著重個核心，因為你要 hold（穩住）自己，上面嗰個（獅頭）先穩定」。

獅頭印洋紫荊

作為香港代表，弘德在細節中暗藏本地特色，讓香港面向世界。負責音樂的教練 Lok 哥指，是次比賽用上香港傳統的編曲風格，「我覺得香港隊係要有自己嘅特色，好似泰國、柬埔寨都會有佢哋自己嘅編曲，香港都可以做到一樣效果」，配上新穎跳樁風格中，務求令人耳目一新。

獅子作為主角，當然亦要在獅身設計上耍花招。弘德將獅頭印上多枚洋紫荊，並有多個「香港」、「香港弘德」的字樣，連獅頭的文字刺繡方法亦是依照香港傳統手藝而成。

港獅隊欠正規練習場 曾匿天橋底練習

弘德獲元朗下攸田村村長批准，該村成為固定練習場，他們