解讀｜英格蘭世界盃外圍賽表現檢閱
三獅兵團新領隊杜曹目標鮮明，就係要喺18個月嘅合約期內，帶領英格蘭高舉世界盃冠軍寶座。究竟杜曹帶隊後英軍表現有咩改變呢？邊啲係核心球員呢？
哈利簡尼不可或缺
英軍頭兩場外圍賽全勝，保持不失，全取6分，而前鋒哈利簡尼亦都喺兩場賽事有入球進帳。
大家仲記唔記得，2023年8月，當時執教拜仁慕尼黑嘅杜曹就將哈利簡尼帶到德甲？而經過一季聯賽合作過後，兩位都更加了解對方嘅要求同踢法，絕對有利哈利簡尼嘅發揮，亦即係話英格蘭攻力絕對無問題。
翼鋒表現平平
杜曹喺第一場外圍賽後公開批評華舒福同霍頓表現不及往常一樣具影響力。事關每當英軍對住一心死守，後防派重兵嘅阿爾巴尼亞同拉脫維亞，杜曹希望一對邊路球員可以踢得更加積極主動，衝擊對方守衛，製造空位。
可惜霍頓甚少好似傳統翼鋒咁落底傳中，反而偏好切入中路。牌面上，查洛保雲較為適合杜曹的踢法，不過同華舒福一樣，最後一腳傳中或射門欠準，未能製造出威脅。不過下半場換入艾斯之後，立即做到杜曹要求，喺左路發難，轟入一球。睇嚟艾斯下場外圍賽，好大機會正選上陣。
擁有域斯占士「說明書」
當年杜曹帶領車路士奪得歐聯冠軍嘅時候，域斯占士正正係球隊其中一個主力球員。杜曹帶領藍軍嘅20個月期間，占士一共交出9個助攻，只係比進攻中場曼治少，所以杜曹相當了解占士，可以令佢發揮出最佳水平。試問英軍咁多位罰球好手，點解偏偏會俾占士射呢？而佢又真係以直入罰球報答領隊知遇之恩。
賽前杜曹提到占士其實狀態大勇，只係車路士限制佢嘅出場時間，所以佢絕對有能力統治整條右路。
摩根羅渣士前途無可限量
領隊杜曹表明希望摩根羅渣士可以以佢嘅強大身體條件質素，喺進攻中場位置入侵對方危險地帶。而羅渣士亦做到領隊要求，多次運球擺脫對方守衛，於中路及邊路位置製造危險，更加參與球隊第二個入球嘅組織。
杜曹曾考慮會排出4-1-4-1陣式，並將五名攻擊型球員踢中前場位置，羅渣士嘅好表現將會為佢帶來更多出場機會，特別係面對一心死守嘅球隊。
