翁靜晶解釋唔後悔嫁俾劉家良 已拍片披露當年意圖性侵者身份 離世後先公開
翁靜晶早前喺自己嘅youtube頻道《危險人物2.0》，同另一位同佢一樣十幾歲就入行嘅雪梨大爆娛圈性侵事件，原來兩位女星少年時代都曾經險遭狼吻，簡直令人髮指。翁靜晶同雪梨都喺入行後同比佢地年長嘅男星（劉家良、徐少強）交往，翁喺節目中回望過去時直指二人嘅已故舊愛「佢哋係唔應該咁樣嚟攞我哋著數。就算我哋有幾鍾意你，嗰個情況係應該拒絕我哋」。翁靜晶甚至表明對過去嘅選擇感到後悔。
翁靜晶同雪梨嘅言論引起討論後，雪梨於受訪時話假如披露當日邊個侵犯佢「會死人架」。到尋日輪到翁靜晶出席公開活動，翁亦未有透露邊個對雪梨毛手毛腳，回應話訪問入面有咁多就咁多，佢亦冇再追問雪梨，雪梨亦冇話俾佢知。至於意圖侵犯翁靜晶嘅導演又係邊個？「女俠」話要賣個關子，但明言拍咗好多片俾自己嘅youtube頻道《危險人物2.0》，當中包括多宗奇案，以至「導演」嘅身份，但就會等翁靜晶離世後先至上架。翁形容咁做好似寫回憶錄咁，驚日後自己記憶唔好，而家記得幾多就做幾多，而且有啲故事嘅相關人士仍然在世。翁靜晶指部份討論案件嘅影片可能過五、六十年後先面世。
廣告
處理唔少敏感猛料，被問到有冇收過死亡恐嚇時，翁靜晶表示已經慣咗，又指香港好安全。翁靜晶又自爆現任丈夫何猶彪夫家何東家族將佢同所有人「隔絕」，唔可以同陌生人傾偈甚至出街，仲話「全世界搵到我嘅人唔多過10個」。
喺同雪梨對談時，翁靜晶表示對過去嘅選擇感到後悔，但係佢尋日就解釋自己唔後悔嫁俾劉家良。翁靜晶話人生有好多交叉點，當時可以選擇視劉師傅為好老師好朋友，選擇聽媽媽話去讀書同做好自己事業，但結果選擇咗轟轟烈烈嘅愛情，後悔嘅係自己任性。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
