近日宏福苑居民在窗戶掛起的字句屢被移除。宏盛閣居民何小姐今日稱，事前已經收到「電話」，要求不要掛出「原址重建」四字。她今日上樓改為掛出「我愛宏福」四字直幡，但仍屢被警方叫出單位外溝通，警方以安全為由要求她收回直幡。何小姐最終收起「我愛宏福」直幡，只能在屋內橙帶內張貼字句，她亦指就連在屋內也不准張貼「原址重建」。
《法庭線》就事件向警方查詢，包括有否要求居民不准張貼「原址重建」字句等，警方回覆指採取任何行動，均會按實際情況處理。
何小姐質疑有何法例阻止「原址重建」四字見街
何小姐今早上樓前已表示，希望可以在窗戶張貼字句，「大家都知最近啲 banner 有啲咩問題㗎啦，都會貼返一啲佢哋所謂正常啲（的字句）」。上樓前何小姐亦向記者展示自己準備張貼的標語，當中有手繪的「宏福」。
她又說知道最近貼字句會受阻撓，「但係盡做啦我自己就。因為自己，即係各個街坊都係想原址重建，但我又唔係好明點解『原址重建』呢 4 個字唔出得街」，她稱有問過是動用甚麼法例阻止「原址重建」四字見街，因自己沒售出業權，「所以唔知點解要制止我哋，或者黐咗要你搣返。」
單位外掛「我愛宏福」後即被收走
何小姐上樓後，單位外一度掛出「我愛宏福」的字句，但不久後即被收走。何小姐下樓後解釋，自己曾在廁所窗戶張貼「我愛宏福」字句，「已經唔黐嗰『4 個字』啦」（原址重建），但遭警方勸說稱「不如你拎返入嚟、黐去第二度，或者唔好黐」，最終要先把字句收入屋內才准下樓。她形容情況荒謬，「我直頭同佢講，間屋係我嘅，咁我要原址重建，你又話唔得，咁又話唔好黐。好喇我和應你唔黐，咁我黐『我愛宏福』啫，咁佢又話唔好，咁我都唔知佢有咩好」。
何小姐說，3 小時的收拾時間內，有一半時間都因張貼問題，被警方叫出單位外溝通，「得閒你又出去講兩句，得閒又搵我出去講兩句」，例如說字句要貼在橙網上免生危險，恐防字句飄出宏福苑外影響行車。
何小姐：屋內也不准張貼「原址重建」
何小姐續說，「原址重建」的字句，連在屋內也不准張貼，「連屋入面你都最好唔好黐㗎喇」。她氣結稱，「我話間屋我㗎嘛，我都無賣到，業權又係我。點解我要做嘅嘢，你哋可以鍾意點呀點，但我鍾意點呀點，又唔得喎。完全係好，好荒謬呀成件事。」
何小姐又批評政府有事情沒足做，大火至今沒人下台，「剩係識得第一日叫你賣業權⋯⋯點解一火燭就要賣業權？呢個唔係好make sense」。她建議政府放手，「還返晒啲善款出嚟，你而家擸晒啲善款，跟住就落你公帑，其實呢樣唔係合理㗎喎。」她又指政府應該先向死傷者道歉，「連死傷者嘅慰問都無做過」、「可能佢覺得得哋宏福苑居民唔重要啦」。距離業權售出限期只剩約一個月，何小姐說昨天才收到收購同意書的文件，而她不打算售出業權。
對於宏福苑接連有字句被撕走，《法庭線》日前向警方查詢，現場是否有警員要求居民移除標語、有何理據，以及航拍機是否由警方或其他部門安排。警方周二晚上回覆「採取任何行動，均會按實際情況處理」。
指有警員態度惡劣「直頭恐嚇我咁」
何小姐下午再上樓後再見記者，表示在社區會堂準備上樓時，有警員態度惡劣，稱可以不容許她上樓，又警告她不得在單位橙網外貼字，「你連個網都唔可以黐出面，一定要黐入面」。
她認為若果繼續反抗，會被禁止上樓，無法取回物品，「都幾惡劣嘅頭先個環境，所以算啦，佢把口大、我把口細。佢要兇你，仲要係好惡咁去兇你⋯⋯我係未見過一個阿 sir 會係咁嘅⋯⋯直頭恐嚇我咁喎」。何小姐質疑，警員態度很有問題，「咁你啲警民關係去咗邊呢我想知」。
「我都唔知而家政府係做乜，咁間屋係我嘅，點解乜都係話唔可以做。」
何小姐指，她最終將字句貼在橙網之內，已經大致完成收拾工作，但很多物品如 CD 等都已經被燒融，無法取回。如果容許，她仍然想再次上樓，「無嘢執都會想上，因為始終自己屋企嚟。」
