前TVB御用細佬黃嘉樂近照身形暴脹：下半身唔可以運動

現年46歲嘅「TVB御用細佬」 黃嘉樂，當年曾於電訊盈科工作，有一次到電視城藝員科檢查電話系統，期間被該部門同事邀請投考藝員訓練班。佢喺畢業後便加入TVB，多年嚟參與過唔少劇集演出，例如《烈火雄心3》、《鐵馬尋橋》、《白色強人》、《果欄中的江湖大嫂》及《解決師》等等，不過佢喺2022年離巢TVB，結束21年賓主關係，選擇北上發展。

黃嘉樂離巢後，幕前演出唔算多，佢就解釋話喺離開TVB後一直有參與幕前拍攝，不過所參與嘅工作都要簽保密協議，所以佢冇喺社交網站上載幕前工作，同埋拍攝嘅節目未出街，導致有佢消失幕前嘅錯覺。

黃嘉樂近年愛上跑步，大家亦有喺佢社交網站見到唔少關於跑步嘅照片，不過佢最近身形及面形明顯暴脹咗唔少，更喺照片寫上：「#下半身唔可以運動 #咁咪運動上半身囉 #講完好似有啲語病」。