兩度贏得香港電影金像獎最佳男配角嘅資深演員廖啟智星期日晚逝世，終年66歲。入行超過40年嘅智叔，演技爐火純青，即使喺主角身邊，總有辦法以精湛演技吸引觀眾注意。

智叔生於基層家庭，細個睇粵語長片見到馮寶寶嘅演出，令佢開始想做演員。中學時代嘅智叔因為學費、成績同搬屋而多次轉校，1972年中學畢業後開始投考TVB藝員訓練班，但係去到1979年以26歲之齡先至被取錄，比起同班同學大好幾歲。因為受訓時表現優異，智叔畢業第2年就有份參與重頭劇《上海灘》，飾演周潤發嘅助手陳祥貴，開始受觀眾注目。

80年代智叔一度離開TVB，後來重新效力至2004年，喺TVB期間演過六十幾部劇集，雖然多數係配角，但係每每令到觀眾留下深刻印象。拍劇以外智叔都有參與綜藝節目《觀樂今宵》以及《城市追撃》嘅主持工作。1990年《歡樂滿東華》入面，智叔表演著住高跟鞋喺離地3層樓高空踩鋼線，智叔太太陳敏兒喺旁邊睇到好緊張，最終安全過關。

智叔喺千禧年後多次進出TVB，離巢期間曾經喺亞視、有線主持節目，並曾經簽約HKTV（港視），後來港視未獲發牌而離開，但係佢喺劇集《選戰》飾演政客嘅演出，堪稱近年代表作。

電視以外，智叔亦參與過唔少電影工作，並且分別憑《籠民》及《證人》兩度贏得香港電影金像獎最佳男配角殊榮。近年智叔喺浸大電影學院出任全職講師，全心提攜新一代演員，智叔幾年前接受港台邀請首次執導單元劇，就係為咗令同學有更多實踐機會。智叔養病前拍咗《尋秦記》、《G風暴》、《一級指控》等港片，觀眾將會喺呢批作品，最後一次欣賞到佢嘅演出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！