福祿壽訓練學院｜梁山山獲「福祿壽」大讚 背景曝光原來有「小張學友」之稱
由阮兆祥、王祖藍、李思捷主持嘅TVB扮嘢真人騷《福祿壽訓練學院》逢星期日晚上8時半播出，從全球海選突圍而出嘅參賽者將會一邊接受連串訓練，一邊執行多項任務，同時復刻演出經典戲劇及舞台作品，透過淘汰制鬥到最後踏上「扮嘢王」之路。《福祿壽訓練學院》目前已播出兩集，上周日（7日）播出嘅一集中，唔少面試者都以扮聲唱歌為主，其中有來自廣州嘅參加者梁山山自稱「行走的CD機」，表演完畢後不但獲現場觀眾及評審一致好評，更被李思捷反問：「你做我哋導師好冇啊？」
自稱「行走的CD機」嘅梁山山分別扮聲模仿張學友《愛是永恆》、譚詠麟《當年情》和古巨基《愛得太遲》，為增加喜劇效果，自製氹女友橋段、「阮兆祥BB」及「噴水」情節，亦於台上發表「物理系變聲模仿論」：「學友嘅歌係裝飾音，古巨基係夾音，由佢變到去譚詠麟都好容易。」其表演令觀眾高聲歡呼，更獲「福祿壽」三位評審按燈，梁山山更得到王祖藍高度讚賞，指鋪排順暢之餘，唱功非常之好：「我冇你扮得咁似，得喎！」李思捷則大讚梁山山力度控制得好好，又難得認低威：「不如咁啦，你做我哋導師好冇呀？」由於有兩位或以上導師按燈，選擇權落在梁山山手上，梁山山最後揀咗李思捷做佢嘅導師。
梁山山嘅演出除咗被網民讚好，指佢唱得好聽之餘，網民更加將焦點放於其外貌上，指佢與林國斌和MIRROR成員Anson Lo撞樣。而原來，梁山山於內地人氣高企，微博坐擁92萬粉絲，2012年以「ME-GA樂隊」主唱身份獲得內地歌唱比賽全國總冠軍，及後曾推出《再見了•小時候》、《甜心是你》、《一水同舟》等音樂作品，並曾現身多個音樂節目和春晚擔任表演嘉賓，亦有「小張學友」之稱。另外，梁山山同時參演多套劇集和電影，包括電影《美麗密令》、《家和萬事驚》、連續劇《外來媳婦本地郎》及《火力少年王之悠風三少年》等等。
