盧冠廷自爆10年前疑差少少遇見生母：緣慳一面都冇法

【on.cc東網專訊】歌手盧冠廷一連兩晚紅館演唱會圓滿落幕，昨晚（22日）亦是他最後一次踏上紅館舞台開騷，吸引大批圈中人捧場，當中包括Gin Lee、鄧月平、金燕玲、李金凱及劉洋等等。約3小時演出內，盧冠廷落力演出之餘，更道出多年來人生笑與淚，台下掌聲多次雷動。演唱會以《陪著你走》揭開序幕，最終以盧冠廷當年參賽勝出的作品《Sing Till The Morning》作結束，畫上一個完美的句號。感性的他再次提及出生至今未見過生母：「我嘅音樂旅途，希望有媽媽陪伴，可惜我從來都未見過佢，最大嘅遺憾係唔知自己媽媽係邊個！」

談到太太唐書琛，盧冠廷感激與對方的相遇，直指夫婦倆相處不夠浪漫：「佢從來冇話過我愛你，我就咁多年講過一次，嗰次係同佢鬧交！」他透露早前在網上成功投得當年參賽歌曲的黑膠唱片，又拍片分享「開箱」過程，當時他激動至淚流滿面。對於近萬歌迷見證自己的「最後一次」，完場前盧冠廷感動表示：「I love you，你哋畀咗張畢業證書我，你哋係love of my life！」

盧冠廷與唐書琛事後齊齊受訪。談到「媽媽的遺憾」，竟然爆出約10年前曾經有一個老太太在友人陪同下，到訪他們西貢的店舖，懷疑就是盧冠廷生母。唐書琛表示：「老太太好斯文、好端莊。佢好似好清楚我哋嘅嘢咁，不過冇留低聯絡嘅方法。」而當時盧冠廷不在場，最後緣慳一面：「信是緣分，都冇辦法。（如果佢仲在世，你想唔想見佢？）梗係想，如果佢唔肯見我，可能今晚偷偷嚟睇我演唱會呢！」

另外，談到今次演唱會，盧冠廷給予自己95分以上，得滿意自己表現，又坦言當初很擔心體力未能應付：「我平日行一條街，都覺得好攰，頭先唱到腳抽筋同唔小心咬到咀唇。（全晚好多次眼濕濕喎。）好彩兩晚我都冇喊出嚟，因為綵排嘅時候喊到唔停得，如果正式演出都喊就好嘥大家時間，因為會唱唔到歌。（頭先你不停捽手？）因為我係緊張嘅人，我由細到大都磨牙，磨到啲牙冇晒，依家嗰啲係整㗎。」

而唐書琛於後台大讚老公靚仔又有才華，能夠下嫁對方是緣分，搞到盧冠廷驚喜非常：「從來冇聽佢講過咁多嘢。（感唔感受到佢愛你？）感受到嘅，佢唔會做啲表面化嘅嘢，行動上嘅嘢佢全部做晒。」

【更多影劇新聞詳情請上東網新聞】