MIRROR成員呂爵安（Edan）一連三場演唱會《EDAN LUI “e to E” LIVE 2025》喺前晚（18日）圓滿結束。一向被網民稱為「妹控」及「寵妹狂魔」嘅Edan，尾場除咗搵嚟首度登上世界排名第1位嘅香港男花劍手蔡俊彥（Ryan）做嘉賓，仲有搵餅印胞妹小如豬（呂蕙如）壓軸登場，開金口合唱《漸漸我們》及唱跳《三分甜》，掀起全場高潮。

小如豬當晚嘅演出非常淡定，Edan仲搞笑話如果公司想搵阿妹出道可以聯絡佢，同時亦可以搵佢哋兄妹檔拍廣告。雖然今次小如豬嘅演出獲得唔少讚賞，不過亦有網民喺Threads出PO批評：「Edan個妹有咩咁靚？明明生到成個男人咁。開threads睇到都尷尬死，仲要懶可愛跳Lollytalk，嘔」，護妹心切嘅Edan上載一張寫有「關你諗事」嘅圖片去回覆該名網民。另外，亦有唔少網民留言認同或鬧爆該名網民，認同佢嘅留言包括「Edan扮女人咁」、「好明顯係Edan扮女人啦」、「以前肥肥地都唔覺似，而家真係勁似」、「好明顯係Edan扮女人啦」、「兩兄妹真係好似樣」、「佢有阿妹架？我以為係Edan扮」及「好似佢呀哥扮女人」等等；而鬧爆佢嘅留言就有「好心你積下口德啦 人哋上去玩吓跳吓啫」、「兩兄妹似樣有咩問題」、「做人有時有返啲口德唔洗死」、「收吓把口啦 唔鍾意你咪唔好睇 你仲嘔」、「我覺得小如豬好可愛⋯ 你唔鍾意咪唔好睇囉」、「跳唱三分甜呀 。唔通黑口黑面咩 。你睇開咩地獄version呀？#關你諗事」及「關你諗事咩，積下口德」等等。