59歲鄧萃雯曾因缺乏安全感傷害到他人 低谷時期人生灰暗：價值觀都崩潰

現年59歲嘅兩屆視后鄧萃雯，喺2013年拍畢TVB劇集《金枝慾孽貳》，選擇離巢將重心轉移內地，好似近日佢就參與內地綜藝節目《乘風2025》（浪姐6）。最近佢接受內地訪談節目《是個人物》訪問，期間講到97金融風暴負資產及愛情路不順遂嘅問題。

鄧萃雯表示佢自己童年係唔快樂及冇安全感，主要原因係父母都唔喺身邊，將佢遺棄喺爺爺嫲嫲屋企，令佢覺得身邊冇人可以相信及依靠，而佢係要去到40幾歲先可以將原生家庭嘅痛慢慢消除。

之後主持人提及到鄧萃雯曾講過1998年係佢人生最低谷時期，鄧萃雯就話自己努力工作，終於成功儲到一筆錢買一間夢想嘅屋，但係估唔到遇上97金融風暴，導致佢嘅存款冇晒及欠銀行錢，同時佢又經歷好多感情嘅失敗，因為冇安全感，令佢好容易相信愛情，或者亂以為嗰啲係愛情，但其實已經傷害到自己及其他人。佢仲話當時自己差唔多30歲，由TVB過檔去亞視，咁多樣嘢加埋一齊，令佢感到前途一片灰暗，因為佢自問唔係一個貪心嘅人，但辛苦好似得不到回報，感覺「價值觀都崩潰了」。

被問到將房子賣出係咩感覺，鄧萃雯就話「我鬆開了一個綁住我的很大的壓力」，但係當佢每次揸車經過單位所在嘅半山區，佢個心都會覺得痛，但經過幾年掙扎後都可以放下。

鄧萃雯表示自己喺愛嘅世界入面錯過咗好多，去到後來佢慢慢學識自愛。佢認為自己遇過真正嘅愛情，不過當時嘅靈魂仲未甦醒，而佢拍過最長嘅拖亦只有兩年幾，主要原因係冇安全感。不過佢就話自己依然相信婚姻，認為去到呢個年紀，唔係搵轟轟烈烈嘅愛情，而係搵可以喺一齊時能做自己嘅愛情，各自可以有一個舒服嘅空間，坦言若有呢種愛情，有一個靈魂伴侶嘅話，係可以唔結婚。