魯振順離巢後自爆 拍《巨塔之后》因張可頤辭演受累冇工開 冇人搵佢傾續約
早前有傳媒發現，68歲嘅資深演員魯振順已經被飛出TVB官網嘅藝人欄目，估計魯係咪已經約滿走人。有傳媒向當事人求證，魯振順承認已經離巢，而且已經返TVB計好強積金，形容心情好平淡，冇覺得可惜。早前魯振順獲薛家燕嘅教育中心聘任為導師，另外又會北上登台，生計唔成問題。
魯振順喺TVB主席許濤4月時與近百名藝員見面嘅活動上，訴說公司不時Cut Show導致收入大減，直言「洗碗都比我賺得多」。自由身嘅魯振順接受由莫家淦、吳雲甫及潘梓峰主持嘅網台節目訪問，爆出不獲續約嘅另一面說法。
廣告
魯振順提到去年上半年的確冇咩演出，但曾經被安排拍攝合拍劇《巨塔之后》及早前播完嘅《刑偵12》，仲收到確認演出檔期嘅信件。不過魯振順話《巨塔之后》遲遲未開拍，佢去了解原因但得唔到答案。到佢拍《刑偵12》2集戲份時先知內情。「（《巨塔之后》）原來改咗劇本，張可頤冇演，變咗宣萱，劇本轉咗，咁我個角色就冇咗」。因為魯振順演出檔期早已被《巨塔之后》hold住，當時劇集未開工，改完劇本又冇放人，其他監製亦唔肯用，令魯振順簡直係手停口停。
廣告
至於點解冇動筆續約，魯振順話「唔係你話簽就簽，你以為自己係邊個？」，並提到合約係靜悄悄完咗，過程中亦冇人搵過佢傾。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
