解讀 | 點解丹佛金塊季尾怒炒總冠軍教練？

NBA西岸勁旅丹佛金塊日前喺剩返3場常規賽嘅季尾階段，宣佈解僱教練米高馬龍 (Michael Malone) 同總經理奇雲保夫 (Calvin Booth)，令人相當震驚。助教大衛艾杜文 (David Adelman) 將會成為暫代教練，據報並無其他教練團隊或管理階層人員被炒。

消息公佈時金塊錄得47勝32負，排喺西岸第4位，不過對上4場常規賽全負。

53歲嘅米高馬龍係NBA史上第4位執教最長教練，只係排喺聖安東尼奧馬刺嘅樸普域治 (Gregg Popovich)、邁阿密熱火嘅史普斯迪拿 (Erik Spoelstra)，同埋金州勇士嘅卡爾 (Steve Kerr) 教練之後。佢成功喺2023年帶領金塊取得球會史上首個總冠軍，亦係3屆MVP尤基治 (Nikola Jokic) 效力金塊10年期間嘅唯一教頭。

所謂冰封三尺，非一日之寒，有消息指金塊嘅更衣室對球隊表現出現咗強大不滿情緒，特別係防守表現。金塊嘅防守指數 (Defensive rating) 只係排聯盟第20位。而尤基治對球隊今季防守意識同整體表現都大表不滿。

不滿情緒亦由場上嘅表現反映出嚟。米高馬龍喺最後執教嘅兩個星期，唔單止輸咗俾明尼蘇達木狼同金州勇士等西岸勁旅，更加喺主場不敵聖安東尼奧馬刺等弱旅。雖然金塊截稿前一刻排喺西岸第4位，但係同第8位球隊只有半場領先優勢，換言之再輸波嘅話，絕對有機會跌落附加賽，最終未能打入季後賽。

另外據報馬龍同保夫亦為球員上陣時間分配向出現重大分歧，令球會成績受影響。保夫希望馬龍多啲用佢喺選秀會所揀選嘅新人，減少老將嘅上陣時間。

比基治 (Jalen Pickett) 就係一個好例子，保夫不滿馬龍喺上星期幾場賽事中都先派出韋斯布祿上陣。而韋少上星期對木狼同馬刺時嘅表現的確令人相當失望，再加上保夫亦有其他方面唔滿意馬龍，所以球員更衣室入面氣氛認真麻麻。

金塊自從喺1月31至2月20日錄得9連勝之後，近期只錄得10勝13負成績，季尾表現嚴重跌Watt。亦都係令到馬龍帥位不保嘅其中一個原因。