前TVB綠葉李忠希轉行正骨復位治療師 曾與陳奕迅鄭中基競爭新人獎
前TVB藝人李忠希（Jones）2020年離巢TVB後，與友人合資6位數喺荔枝角開店轉行正骨復位治療師；日前，有網民分享一段李忠希為藥房店員正骨嘅影片，從影片中看到，該店員大讚李忠希手勢。
有網民於小紅書發布一段李忠希為藥房店員正骨嘅影片，寫道：「前TVB金牌綠業忠希sir原來是啪骨師傅。」影片中，李忠希為藥房女店員正骨：「今日見到你攰，我哋check一check條頸先！你條頸望嚟呢邊啦！咦爭少少喎，嗱呢邊就近咗少少！」之後，佢就為女店員按壓耳後穴位，再為其調整頭部及頸部位置，三兩下手勢就已經令店員表示成身鬆晒。
李忠希1996年以歌手身份入行，曾推出大碟《太著緊》，並勇奪「叱咤樂壇生力軍男歌手」銅獎，當年金獎及銀獎得主為鄭中基及陳奕迅。直至1999年加入無綫藝員訓練班簽約TVB，同期藝人包括林峯、楊怡、張美妮、徐榮及趙永洪等等，曾出演《識法代言人》、《點解阿Sir係阿Sir》、《回到三國》、《解決師》、《逆天奇案》等劇集，亦曾擔任《東張西望》主持。曾於2012年轉投HKTV，之後喺2014年回巢，直至2020年，李忠希宣布離開效力22年嘅TVB。多年來，李忠希透露自己為養家及追夢，曾投資飲食生意、為雪糕廠做市場部總監等等。
李忠希曾分享自己入行正骨復位治療師嘅經歷，表示當年因疫情而影響演藝工作，於是經常上網看正骨片段，喺女兒鼓勵下自薦應徵學師仔，又跟中醫整脊師做學徒，恰巧遇到工作室嘅地方及現時拍檔就決定開設正骨館，除咗做正骨復位治療師，更負責埋marketing，太太就負責接單和管數；又曾大讚徐榮夠晒好兄弟，幫佢喺社交媒體上出post令生意大增。
