【Yahoo新聞報道】在這個「執笠潮」成風、不少食肆選擇在一夜之間拉閘、急急告別的時代，北角「人人和平」的老闆許先生卻決定給這間店，也給這座城市，留下長達365日的告別式。餐廳在facebook專頁宣佈一年倒數計劃，強調「不是終章」，並非告別香港，但北角堡壘街斜坡上的「人人和平」，一年後會否在北角重生、抑或在港島其他地區落腳，還看品牌的造化。
「見到個市道，係睇唔透」
賣過燒味、盆菜、羊腩煲，也在「人人和平」本店對面開了西餐廳「Gotthard Base」，在堡壘街打滾13年的許先生，談起「一年之約」，語帶平靜。疫情後的香港，餐飲版圖被徹底重塑。在家工作文化消失，讓曾經穩定的午市外賣急跌，營運重心需放置於晚市堂食。不過近年週末的港島區，就因港島人熱衷「快閃旅行」而變得空洞，專為圍餐而設、位於「人人和平」本店旁的B店，「除咗大時大節，印象中都未試過一星期開足七日」，即使整體食客有所增加，亦無法彌補外賣的下跌。生意額由2023年開始逐年被「陰乾」，料過去的2025年亦有所虧損，「每年10%咁下跌……我哋覺得呢個情況唔可以再持續落去，見到個市道，係睇唔透」。
「真係要決定割捨」
在餐飲業寒冬下，最容易的做法是「止蝕」，至於決定告別的「最後一根稻草」，許指中秋節一般都是中餐旺季，但「上年中秋節生意真係差得幾緊要」，便以觀察秋冬旺季決定去向。結果去年11、12月生意比2024年同期進一步下跌，「我哋都覺得個勢頭唔會改變，真係要決定割捨」。
「所有嘢都好嚟好去」
不少店舖會匆匆交代結業事宜，許先生選擇把告別期拉長到一年。「我哋覺得每樣嘢都要好好交代，我哋唔想得返兩個月、三個月，嗰兩三個月會超級好生意，但我哋都自問負荷唔到突如其來咁多人」。告別期拉長亦可讓真正喜歡他們的街坊，特別是已移民的老顧客有足夠時間回來懷念，也讓一直打拼的同事有時間思考前路。「所有嘢都好嚟好去，唔係到有一日突然間欠晒啲街數、唔出糧就走咗去，好不負責任」。
另外一個「拉長告別」的原因是今年上半年要處理英國分店事宜，下半年才專心對北角人人和平作前路考量。許先生指，人人和平目標客群是35歲以上、對生活質素和食物質素有所追求的人，「佢哋唔會去食兩餸飯，想食好啲，『唔好浪費卡路里』」。他強調「雖然呢個客群唔多，但我哋都想轉型佢focus返呢類客」，故計劃轉型為精緻小菜館，走中高端路線。
「個心梗係好想繼續喺度，但我哋做生意唔可以每年都係蝕咁多錢」。2013年3月開設「和平小飯店」，後來因名稱版權問題，改為「人人和平小飯店」，再於數年前「rebranding」，改稱「人人和平」，英文名亦改為「Hoper’s base」；現時的商標是和平的「平」字，線條如光線段散出去，也是希望和溫暖。「我覺得嚟食嘢嘅人，普遍都係同一個信念，留喺香港抱持住一個積極嘅心態、大家都仲係抱住一個希望，咁不如就叫Hoper’s base啦！」
「一班人食嘢、圍爐，都係我哋嘅生活文化」
有食客形容「人人和平」是北角的集體回憶，「呢番說話令我哋好感動，我哋都已經做晒我哋要做嘅嘢」。「我由一個完全喺飲食業無經驗嘅人，做到啲客人會鍾意食我哋啲嘢、做到後生都會嚟食一啲懷舊香港菜，炸蟹鉗、金錢雞，我覺得都係一個成就」。雖然「人人和平」未來或許會向外國發展，但許先生強調，「一班人食嘢、圍爐，都係我哋嘅生活文化，希望大家喺邊度都好，食住香港嘅食物，都會記住我哋香港嘅文化」。
