【EURO睇波團】盧覓雪：睇俊男睇比寧咸

【Now Sports】藝人盧覓雪（Michelle）本身也是一名資深球迷，亦是英格蘭死硬派擁躉，她表示英格蘭今屆歐洲國家盃人腳「個個都啱位」，但又怕希望愈大失望愈大。女士睇波也睇俊男，她表示今屆會睇實比寧咸。「正正式式為睇歐洲國家盃，特登訂收費電視服務係1996年，嗰年英格蘭係主辦國。為睇波要訂嗰個電視台，你知啦，要取消嗰個電視台好艱難㗎嘛，要好大勇氣㗎。」Michelle笑談過去的歐洲國家盃的睇波經歷，表示未曾入場睇歐國盃，只曾入場睇世界盃決賽，但相信下屆會入場觀戰：「2028年會去番英格蘭（與蘇格蘭等地合辦），兜咗好大個圈，幾廿年又去番嗰度，所以我估到時會入場睇。」

被問到睇EURO的難忘回憶時，她說：「最大事件應該係2016年荷蘭缺席歐國盃。由我細個開始睇足球，咩告魯夫、三劍俠、伯金、雲尼斯達萊都好，唔同年代香港球迷都睇慣，唔會陌生，佢哋向來都係悲情主角。唔贏都算，連入歐國盃都冇份，你話係咪癲呀！呢個係我睇波咁耐最大驚恐，吓！唔可能啩！」

Michelle表示雖然每次支持英格蘭都失望，但今屆會繼續追捧：「嗱，永遠都係講嗰句，英格蘭好似中魔咒咁，明明嗰屆人腳好似好似樣，個個位都齊人，次次都咁講，對上最近（攞冠軍）應該係曼聯盛世嘅時候，如果有埋傑斯去踢英格蘭就掂，但佢係代表威爾斯……每次我哋最後都係失望。」

「今屆真係個個都啱位，霍頓好、比寧咸好、薩卡好，仲有哈利簡尼我都覺得佢冇得頂，絕世黑仔王咁多年冇獎盃，好嘞，轉會去拜仁慕尼黑，諗住冇衰啦啩？佢都攞到（德甲）神射手，都係攞唔到獎盃，但至少佢過去喺拜仁呢一季，你冇嘢可以彈佢，交足貨畀你，係你隊波騎呢。Anyway，喺我角度，今屆英格蘭前中後、左中右都得。」

「仲有個高爾彭馬，應該咁講，從來都冇英格蘭領隊好似修夫基咁幸福，呢啲叫happy problem。以前掹掹緊好似啱啱湊得成一隊，依家就好多選擇，好威水。成隊波又好後生，最老已經係哈利簡尼同埋嗰個愛華頓龍門（佐敦碧福特）。我睇今季阿仙奴最後對愛華頓嗰場波，佢（佐敦碧福特）討厭到不得了，因為我係阿仙奴躉，不過佢撲救係掂嘅。所以，我都係偏心英格蘭。」

問她英格蘭有哪些勁敵時，她繼續口若懸河：「要睇隊波點組成，亦睇線路，咁我覺得今屆英格蘭都好好彩，喺C組唔係太可怕。你睇死亡B組又西班牙又意大利又克羅地亞！所以英格蘭喺C組出線就毫無疑問，但最驚係喺出線毫無疑問，磨練又唔夠多。好茅盾，又驚佢唔入，又驚佢遇強隊，又驚佢唔知做乜鬼無端端落馬，但我覺得今屆喺組別上就有優勢。秤晒所有，相對強嘅就係法國。」

「不過法國將重心放晒喺安巴比度，見佢有時又short short地，你睇呢季PSG重心喺晒佢度，但唔覺得好出色。講番英格蘭，你見到霍頓佢哋好出色，懷斯、薩卡成季都好好，仲有彭馬喺車仔，喺佢哋自己球隊嘅表現係出色到曉飛，依家將所有兵器擺埋一齊喎......我唔想講英格蘭太多好話，今年隊波似樣，有時好驚希望愈大失望愈大，又係嗰啲啦。」

女球迷觀戰不忘觀賞俊男，Michelle表示今屆首選比寧咸：「睇靚仔都係我擅長，但其實我睇波先嘅，先睇腳法好唔好，有時你睇佢腳法好，個樣都靚啲，哈哈哈！當中我覺得比寧咸好靚仔，有一個好靚嘅feature，眼耳口鼻都好靚，所以我梗係