TVB節目《真相．猜．情．尋》再次引起社會對1996年造成5人死亡嘅八仙嶺山火嘅討論，事件中受傷嘅學生張潤衡，多年來一直被網民質疑係山火元兇。節目播出後，唔少網民去到張潤衡嘅facebook專頁留言，而張亦都喺尋日回覆唔少網民嘅提問。

張潤衡喺不同嘅留言中回應指，山火發生時「其實我係坐咗喺度玩game boy ，聽到老師叫我走，我就即刻走。我點樣知真相？」。山火調查報告提及，有中學生喺發生山火位置附近小平原吸煙，張回應「我在山上沒有見過人食煙」。目擊者提及身穿「藍白波衫」嘅人吸煙，有網民問張潤衡係咪此人，張回應「我當日係有着過件藍白色嘅波衫，但係同時間我都有另一件長袖嘅黑白色衫。我依稀記得有印象，就係上小平原之前嗰段路，因為我哋要爆林，嗰度係喺密林入面嘅，啲樹枝都好鎅手，所以喺嗰個位置我係有着返嗰件長袖嘅黑白色衫。至於之後我幾時除返嗰件黑白色衫，我就真係冇印象了」。

有網民叫張潤衡睇返《真相．猜．情．尋》，張直指「我唔會睇佢呢個節目，呢個節目本身就係出於極唔尊重嘅情況發生」。節目中提到張潤衡本來答應受訪，後來臨時拒絕，而張就喺留言講出故事另一版本。「有好多鏡頭以外嘅嘢你哋唔知，正如我從來都冇應承過佢哋接受訪問，佢就夾硬喺個節目度話我應承咗佢。事實係嗰個李嘉嘉一開始打電話俾我，我已經拒絕咗。佢要約我傾幾句，得，我就約咗佢諗住傾幾句。點知佢帶晒成對人過嚟，完全事前冇通知過我。呢啲嘢你哋又知咩？」

《真相．猜．情．尋》以張潤衡2015年接受傳媒訪問時曾表示「真相，俾你搵到又點呢？」作結，呢句「金句」亦令張潤衡備受批評。張潤衡留言回應指，「金句」成句原文係「我知道真相咁又可以點？ 唔通我可以改變過去發生嘅事情之類，你哋咁得閒咁有時間就自己上網去搵返嗰條片啦」、「然後你cap咗我呢一句出嚟，就話我去表達，『就算你知道真相都耐我唔何』，而我想表達嘅係，『就算而家搵到真相，我都唔可以改變已經經歷咗嘅痛苦，倒不如將眼光放返喺前面嘅路』」。