港姐面試每年都有另類佳麗突圍，今年唔使問一定係「東涌羅浩楷」霍韻璇（Kirsten)，仲成為YAHOO熱門搜尋十大！見到Kristen不禁諗起真．羅浩楷，原來楷哥呢位扮嘢高手同Kirsten一樣咁熱愛音樂。

今年71歲嘅楷哥，18歲考入電影公司訓練班，同班同學有劉江。楷哥入行之後唔只拍電影同劇集仲喺酒吧做樂手，佢識得彈結他同鋼琴，全部都係自學就識！楷哥亦係歌唱老師，佢話係用以前跟老師學唱歌所識嘅技巧，再「偷師」開班授徒。

羅浩楷曾經係《歡樂今宵》成員之一，擅長扮林子祥，到80年代後期楷哥減少幕前演出，投資經營酒吧，全盛時期有8－10間。1997年楷哥重返TVB之後密密拍劇，平均每年有4－5套劇出街，但係2015年嘅《東坡家事》之後就冇再參與演出，並且喺2017年同TVB完約後唔再續約。

原來楷哥2016年因為椎間盤突出而影響行動及自理能力，最差嘅時候甚至90度駝背，而且要戴頸箍，令佢身心受盡折磨。後來佢駛咗7位數接受治療後已經有好轉，楷哥仲公開感謝太太照顧。

雖然患病使費大，不過楷哥係炒股高手，甚至連楷嫂都話「全電視城都知」。2017年現身TVB生日會時，記者好關注楷哥經濟狀況，佢就show手上嘅3卡鑽戒，話係「買股票送嘅」，直言患病期間靠炒股維生。

羅浩楷結婚多年，向來無咩緋聞，但係後生時都有單好爆嘅花邊新聞！楷哥多年前同女藝人區靄玲（曾參演《逆緣》、《牛下女高音》）拍過拖，分手後楷哥依依不捨，居然接受雜誌訪問大爆二人之間私密事，話成日為女友洗底褲，仲拎住區靄玲條底褲影封面相！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！