近年TVB小生花旦及綠葉離巢不間斷，以致成日睇嚟睇去都係嗰幾個演員。日前，YouTuber肥蛙就邀請一名現任電視台女藝人以電話方式，匿名身份接受訪問，大爆不為人知嘅內幕同藝人辛酸史，仲直言由於公司關係唔可以公開表示支持姜濤同Edan呂爵安，藉呢次訪問機會表白心意以及想講句「香港加油」，影片至今已獲得23萬點撃率（截至1/6）。

受訪女藝人表示自己18歲誤打誤撞透過藝員訓練班入行，當時讀訓練班嗰陣只有1,000港元車馬費，畢業後以底薪$5000港元簽約3年，指公司規定合約分為普通藝員合約同經理人合約，如果簽嘅係普通藝員合約，可以自行出去工作，但就唔可以去其他電視台；而經理人合約就所有嘢都要經過經理人出面；如果畀人雪藏一年，解凍之後就要唔收人工償還嗰一年嘅工作，佢仲指雪藏原因有機會係刑事行為、男女關係混亂，或者觸碰到任何政治關係：「難聽啲講句，佢話啱就啱，錯就錯。」

對於藝人飯局，受訪女藝人就透露的確係有啲「有價飯局」，指價格開到好誇張，可以叫價100至200萬，小飯局就可能係幾十萬一餐飯：「我知道喺出面負責搵開人去飯局嗰啲人，佢哋有一個list，會寫明邊個女明星幾多錢。」，佢亦大爆藝人喺圈中地位係最低，甚至連化妝師、服裝師和髮型師都不及，有好多人都會見高拜見低踩，自己就試過因為劇組要遷就較高級嘅藝人，唔會諗其他人需唔需要休息，而令佢連續三日三夜唔卸妝拍劇。

佢又坦言演員好難有演出機會，亦無得你揀，劇集主角多數都係外面嘅人，一係港姐：「我哋行行企企咁多年，一個小小機會都難遇到，成日都驚講錯、做錯而有壓力。」至於其他角色，就算幾唔想做都無得推，因為有啲性格唔好嘅副導演有機會向藝員部投訴，因而被「照肺」，所以佢就話：「如果唔鍾意做呢份工，真係一早就走咗，冇可能捱得到，所以喺度留到超過5年以上嘅人，都一定係好鍾意演戲，又或者好鍾意娛樂大眾，如果唔係就晨早走咗。」

而受訪女藝人又提到，唔少藝人都會落力討好導演或者高層，過時過節會送上千元果籃，喺唔同飯聚、休息時間又會藉機主動獻身，甚至「挨身挨勢」，以博取更多機會。唔少網民睇完影片都紛紛留言指電視台苛刻，又覺得該名女藝人好可憐：「希望你合約完左就快啲走」、「做演員真係壓力好大」、「我識有朋友做CCTVB，真係好恐怖，身不由己，同埋受訪嗰個人講嘅嘢喺真㗎」、「做藝人同做奴才真係分別不大」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！