首名港產日本AV女優素海霖今天（5月31日）舉行出道以來首個粉絲見面會，與500多名粉絲見面、握手、拍攝即影即有合照，門外大排長龍。有粉絲特意請假到場與素海霖見面，「欣賞佢好勇敢，嚟支持佢」。亦有粉絲情侶結伴撐場，大讚她夠本土，「無扮㗎妹，做到港女嘅感覺」。素海霖則感謝一眾粉絲，希望把工作重心留在香港，「我好愛香港、好鍾意香港嘅生活」。

文字記者：Carmen C.

攝影記者：HLKP

素海霖於三月以藝名「絵麗奈」出道，目前已推出兩部成人影片。見面會入場費150元，包簽名、握手及小食，另可購買179元即影即有合照券／攝影券。現場亦有紀念品出售，包括T恤（359元）、雨傘（289元）及海報（99元）

情侶齊睇素海霖演出：同聲同氣又親切

見面會在旺角一間餐廳舉行，現場粉絲以20至30多歲男性為主，女士也佔約一成，亦有不少情侶一同到場支持素海霖。Jimmy和海爾接受《Yahoo新聞》訪問時說：「想同佢講佢好叻，加油！我哋兩個都好支持佢，話晒係第一個香港人」，兩人一直是素海霖公司「Faleno」的忠實粉絲，「本身都係付費會員有睇開」。兩人在家一同觀看過她的作品，認為她「無扮㗎妹，做到港女嘅感覺幾好」。Jimmy則指：「喺日本人咁高質、咁高清嘅set up之下，可以見到香港人嘅演出係好開心，同聲同氣又親切」。

兩人在會面會共花費約800元。對於網上有聲音指收費昂貴，Jimmy稱：「其實平到喊，因為喺日本要抽，首先買咗隻碟、再抽籌、啱時間先去到」，形容「唔係報名就有」，「而家又唔使搭飛機，落一落街就到」。

另一對情侶Matthew和WingYi也是結伴到場，亦曾一同觀賞其作品。WingYi指素海霖「係我嗰type，佢笑起嚟個樣好sweet，亦都好本土，睇落係個無機心嘅人，希望佢會繼續努力」。兩人認為入場定價合理，「始終book場都要錢，又要員工喺度」。WingYi亦有向素海霖打氣，「佢轉發咗我話會帶男朋友嚟嘅IG msg，希望佢下次會認得我」。

Alfred則與友人Ming特意抽空到場，共花費1500元，包括入場門票及七張即影即有合照，「我覺得係一個心意同一個體驗」。Alfred將與AV女優見面稱為「神奇嘅體驗」，Ming則補充：「即係你好少機會會見到個AV女優，今日見到個體驗好正」。兩人均曾觀看素海霖的兩部作品，「係以藝術角度欣賞，兩部都各有千秋」。Alfred指特別欣賞素海霖的勇氣，「第一部出嘅時候，有唔少網民嘅留言都比較惡意，要承受呢一切都唔容易」，並向素海霖打氣，「唔使理啲網民講咩，做好自己就得」。

張先生攜同禮物到場支持，他指最初觀賞素海霖的作品只是「人睇我睇」，但了解其為人、看過她的訪問後，發現她堅持理想，就更為欣賞。喜愛踢足球的他更向素送上一對龍門手套，上面寫有勉勵說話，比喻她如足球隊龍門般「成日都係得一個人、好多嘢靠佢自己，佢喺呢個行業真係好孤獨」，「希望香港人可以做佢球場上嘅第十二人」。

素：好攰但好充實

粉絲見面會設於平日，素海霖接受《Yahoo新聞》訪問時笑稱「一開頭好驚無人」，又曾收過訊息問「可唔可以摸胸」。但她指參加者今次相當守規矩，「好彩都無人越界」，「（未經批准）影相嘅人都比想像中少」。看見數百粉絲到場，她指「好攰但真係好充實」，「每個人嘅時間都好寶貴，最窩心嘅係見到佢哋特登抽時間過嚟、選擇過嚟見我」。

她亦有份設計現場的紀念品，「遮同T恤搵咗林祥焜先生幫手畫，我都想係唔太性感、日系啲，畀咗啲參考圖佢創作」。

她指有粉絲在金鐘上班，趁午膳時間趕到旺角見面會地點，但因人龍不絕而急急折返，放工後再次趕到，「好有心、好感動」。是日天氣酷熱，但在場外排隊人流不絕，「有人等咗個幾鐘，成身濕晒」，素海霖萬分感謝，「出面好熱，又落雨，見到好多人排隊都想快啲」，笑言「我自己都未必肯等一個偶像等一個鐘」。

對於或有其他港人成為AV女優，她指不會給自己太大壓力，「一太大壓力就會想放棄晒一切」。現時她視日本的AV女優為競爭對手，「我覺得佢哋好勁，好想做到佢哋咁，但需要時間。」亦會將知名AV女優如三上悠亞等人視為目標，「希望我自己可以唔會放棄、堅持到落去」。

入行兩個多月，家人仍未與她聯絡，有後悔嗎？素海霖指比起後悔，更多是遺憾，「一定要失去啲嘢先會得到啲嘢」。她也會擔心這股熱潮會冷卻，所以也訂下目標，「繼續喺呢行至少三年」，視作磨練時期，「希望加把勁喺日本打出名堂」。但她強調「我好愛香港、好鍾意香港嘅生活」，加上現時事業尚未成功，工作重心仍會留在香港。