爆一爆｜新世界「務實外交」估你唔到股價升40%（Louise）
香港幾大地產商呢排新聞都好「爆 」，誠哥賣碼頭由放煙花變左踩地雷已夠爆，再爆出恒基四叔過身，各大媒體鋪天蓋地爆四叔生平秘聞。再睇真下，原來新世界（0017.HK）都好爆，過去一個月股價爆升四成有多，真係估佢唔到。
美股外幣即時報價 多國新聞任睇
當年彤叔貼士：新世界三蚊抵買
還記得立春之後，2月6日在彩虹邨金碧酒家，與一眾財經KOL「壞孩子」同枱食飯吹水，講起新世界股價當年跌到得返三蚊雞時，記者「狙擊」彤叔佢靜雞雞「醒」記者話三蚊抵買，同枱口痕KOL 仲話：「宜家都差唔多啦。」當日新世界股價係$4.1，過去一個多月，股價彈升四成有多，最高去到$6；本週二傳出鄭志剛拉緊LV落戶尖沙咀K11 Musea 開個Mega 店，股價一日勁升近8%。呢個世界真係富貴險中求，小妹膽小如鼠唔敢落叠撈此股，真係飲恨呢！
新世界在債務困擾之下， 聽聞純官北上面聖京官，獲得阿爺關顧，四大國有銀行現「 奉旨」撐新世界免得要債務重組。睇返新世界5日的成交，淨買入排頭位喺港股通（深），有317萬股，現又有傳言指中國將4000億美元外匯儲備駐港，到時又會否掃貨？其實中央十分「眷顧」香港，單是二月份港股通（滬深） 已有$1528億北水流入港股，令恒指直逼25000點。
新世界面對債務危機，純官北上同「阿爺」商量商量，另一邊廂長子鄭志剛則去「務實外交」。年初見完法國總統之後就有後著，如果真拉到LV Mega Store落戶搞旺個場，就好似K11Musea對出嘅星光大道咁星光熠熠，到時仲使鬼燒銀紙放煙花吸旅客咩？
