叱咤2024︱陳考威勇奪監製大獎 宣布迎娶Yanny陳穎欣獲網民祝福
《2024年度叱咤樂壇流行榜頒獎典禮》喺元旦日晚已經圓滿舉行，作為最矚目及最令樂迷期待嘅樂壇成績表，當然吸引唔少人關注。入行15年嘅陳考威（Gareth Chan）喺噚晚奪得「叱咤樂壇監製大獎」，首次上台拎此獎項嘅佢表現緊張又激動，期間更宣布迎娶與拍拖接近八年、試當真成員兼前Super Girls成員Yanny陳穎欣。
喺講得獎感受時，陳考威就話：「我其實都有諗過個speech，but I know I will blank out，so thank you so much。」之後佢就多謝歌手及唱片公司等嘅信任及支持，最後佢多謝另一半Yanny陳穎欣及宣布婚訊：「Last，有一個人一定要講，我好多謝我另外一半Yanny陳穎欣，因為其實我廣東話唔係最叻，但係我每次準備去錄一隻歌，佢都會喺屋企花時間同我去翻譯俾我聽，令到我明白隻歌更多，所以好多謝佢一直嘅陪伴，同埋我會應承佢，2025年，今年我會搞好我哋嘅婚禮。多謝大家！ Happy New Year！」
消息一出，唔少網民紛紛留言恭喜佢哋，例如「恭喜Yanny！要幸福快樂」、「Congratulations 陳考威 & Yanny」、「Congrats yan b 結婚！」、「Congratulations」及「Congrats yanb!!! 陳生你娶咗全YouTube 最靚最勇嗰個女仔!!!!!」等等。
