【你要知】「鬼月」必讀冷知識 路邊祭祀其實是...
「盂蘭節氣魄更壯，盂蘭勝會心中不必驚慌！」有網民為盂蘭節譜上歌詞，不過「鬼月」期間的儀式就不能當笑話。農曆7月，盛傳鬼門關大開，不少人會依照傳統，舉行各種各樣的活動，讓一班「老友記」(陰靈)參與，亦可趁機探望在生的家人。到底除了一些耳熟能詳的禁忌之外，「鬼節」尚有甚麼冷知識呢？東網請來殯儀業界人士，為大家一一拆解！
1. 盂蘭勝會的用意
或許大家都會知道，盂蘭勝會的「觀眾」，是一班「老友記」，不過又有否諗過原來盂蘭勝會跟出殯時打齋是異曲同工？「殯儀達人」陳達仁解釋，打齋只有一位「主角」，而盂蘭勝會的「主角」則是一眾先人，師傅會進行法事超度，讓先人聽經文，享用祭品和金銀衣紙，「呢啲都係歎，享受親人對佢哋嘅掛念之情。」
2. 路邊祭祀是遊魂野鬼的「自助餐」
路邊祭祀一般會在街邊舖頭或屋企樓下見到，陳達仁指，其目的是讓遊魂野鬼在街上任食「自助餐」，從而祈求家人出入平安，保佑自己，希望陰靈「唔好搞搞震」。他表示，「老友記」賀節亦有階級之分：「有啲本身有佛堂或靈位供奉，就會留喺自己靈位，等後人拜祭時聚吓。」
看到人「燒街衣」，總會擔心「踩灰」。陳表示，踩中灰燼其實並無大礙，亦不需要特別處理。但他提醒，如果踩中仍未化灰的衣紙，應該至少點上清香一炷，以示歉意，更理想的是重新再燒一份衣紙，「不過通常都冇乜人咁做，除非『瀨咗嘢』，否則都係拜一拜，講聲唔好意思。」
另外，他指，除了盂蘭勝會及路邊祭祀，「鬼節」尚有第三類活動 － 神功戲。神功戲有潮州戲、福建戲等分別，供「老友記」觀賞，可解作為陰靈而設的演唱會或舞台劇。陳提醒，神功戲並不是法事，表演者只是演員，而場地附近一般有地方供人祭祀，悼念先人。雖然如此，但其實神功戲至今已成為一項傳統習俗，「有人睇嘅，仲好熱鬧。」
3. 「鬼節」前特別多人死？
從事殯儀業多年的陳達仁表示，未知是否巧合，在他實際經驗中，大時大節的「死人」數目的確比平常日子多，但對此沒有一個統一解釋。惟他認為，死亡有定數，更直言試過一個星期內接到多宗生意，排文件時發現10多張死亡證的日子，都集中某幾天：「打咗個冷震，自此留意到每個月收到嘅客人，都係分布某2、3個日子，未試過好平均咁1日1個，大時大節係收到特別多電話，覺得真係有主宰。」
4. 「鬼節」有何禁忌？
其實盂蘭節禁忌，不外乎是「唔好靠牆行」、「有人叫你個名唔好轉頭望」等。陳達仁坦言，不少人會認為「鬼月」諸事不宜，其實有些大事，又不能不做，例如殯葬，「以前就話唔可以上骨灰位同出殯住，但依家龕位唔多，唔上就冇，咁你上唔上？過咗7月先出殯，遺體要擺好耐，係做唔到。」又例如結婚生仔，「生仔控制唔到，同埋睇通勝，其實7月都會有好日子。」他亦補充，有些禁忌，本質上亦是一些「不好的事」，例如「唔好出夜街」及「唔好游夜水」，「你睇依家夜晚啲人多到，而平時游夜水冇救生員我都唔建議，農曆7月會唔會更甚，呢樣就見仁見智。」
陳最後提醒，不少禁忌是根據傳統習俗流傳下來，又或是基於情意結而做，其實只要心安理得，對得住先人及自己便可：「基於尊重，做咗你就唔會輸，唔好嘗試侮辱靈界，信則有，不信就係慰藉心靈，有個依靠。」
