爆一爆|大陸企業來港搶灘 鬥燒銀紙有玄機(Louise)
呢半年本地食肆執笠嘅消息已睇到麻木,但同時有十幾廿家大陸餐飲巨企,已在香港註冊商標「搶灘」喎,恕小妹大鄉里,呢啲乜乜麻辣火鍋、乜嘢湖南土菜、朱光玉又巴奴毛肚火鍋真係唔識佢,甚至上月上市後大跌4成茶百度(2555.HK)亦冇歎過,不過就好有興趣了解大陸巨企到底「搶灘」還是「白鱔上沙灘」呢?
美股外幣即時報價 多國新聞任睇
企業 CV 有香港有着數
上汽集團旗下嘅MG電動車,香港個代理係富利堡老細Eric Wong,相信最了解當中盤算,佢同比亞迪嘅代理,在香港正在肉膊爭奪電動車市場,Eric黃謂:「香港係一個擂台,大陸企業『内卷』嚴重,所以先來香港建立品牌鬥燒銀紙,睇下燒到幾耐,以部署走去東南亞、歐洲開拓市場,始終香港仲有法規,例如做幾多生意、賣幾多部車冇得做假,冇得篤數,大陸嘅企業 CV(履歷)有香港,點都有着數。」
小妹問:「咁香港仲有啲價值噃。」Eric 黃答:「香港係有價值,不過啲官唔識啫。」佢老哥係九龍灣旗艦店剛開幕,四個月開咗六個點來迎戰;聽佢講嚟緊仲有十幾個大陸電車品牌殺到香港,「你知,大陸佬無性㗎,一個品牌開五個點,咁就五十幾個點,我喺個血淋淋嘅市場同佢哋打㗎!以我香港仔嘅精神,正所謂猛虎不及地頭蟲,我唔當佢哋代理係對手,我係同車廠打!」Eric 黃一臉寸嘴地說。
業務擴張錢可「走出去」
大陸佬無性,香港人早已見識過,早年係啟德高價投地、追逐山頂豪宅至10萬蚊呎、快手(1024.HK)一上市谷到四百幾銀一股,不過有冇性都要睇下啲錢出唔出到香港。
大陸企業要係香港開鋪燒銀紙,咁錢從何來?常聽banker講現時大陸人嘅錢好難出來,不過如果有檔生意想話去外地擴張就有計,可以透過37號文件向外管局申請,咁樣資金就可「合法」走出嚟,但只許做生意不准買房地產,一般外資銀行都幫大陸客安排得到。咁係香港做生意冇話一定賺,仲要預燒銀紙,最緊要錢出到來,呢個咪就係香港嘅價值囉。當然部署上市圈錢又是另一回事,須知道大陸有些企業,逼住要上市來還銀行一屁股債㗎。