政Whats噏：拆禮物日贈㷫 自由黨遭通街唱
【on.cc東網專訊】喺啱啱過去嘅Boxing Day(拆禮物日)，有人為自由黨送上「大禮」贈「㷫」，喺港九多區貼出批評自由黨嘅標語，寫上「香港人憤怒，拎起磚頭勇敢抗爭」、「靠種票贏選舉，自由黨卑鄙無賴」。由於字句寫到明關「選舉」事，有建制人士就懷疑事件可能同上月底嘅中西區區議會山頂區補選有關，而自由黨亦已就事件報警。
中西區區議會山頂選區原議員係自由黨嘅陳浩濂，佢入咗政府熱廚房做財經事務及庫務局副局長，所以要辭去區議員職務，政府就喺上月26日搞補選，自由黨派出教育局前政助楊哲安參選，與曾參加佔領行動、屬於民主派嘅「2047香港監察」召集人錢志健對壘。選舉當日2人都落力拉票，各自搵嚟建制同泛民政界重量級人士幫拖，力爭出線，做個議員「插班生」。最終楊哲安以1378票，以大比數擊敗僅取得394票嘅錢志健。
選舉至今已落幕1個月，期間一直風平浪靜，楊哲安就密密做地區工作，又成日話要做好「插班生」，學下區議會嘅工作流程，其他乜都唔理住。正當大家開開心心慶祝緊聖誕嘅時候，港九各區包括山頂麥當勞道、紅隧行人天橋、旺角新世紀廣場巴士站、中環閣麟街等，都出現批評自由黨嘅標語。有建制人士就估計，可能因為補選結果，搞到一班「深黃」人士好不滿，所以做出呢啲事嚟攻擊自由黨。
負責報警嘅自由黨副主席邵家輝就話有朋友喺麥當勞道住，昨晚(26日)見到喺街有路牌畀人貼咗標語，就即刻通知佢，點知之後發現中環同紅隧附近都有，今早佢通知路政署去拆標語同埋報警。知唔知乜嘢人做？係咪同補選有關？佢就笑住話「補選又選完」，都唔知乜嘢人咁無聊同嘥時間，做埋啲咁嘅嘢，依家都評估緊係乜嘢人做。
自由黨黨魁鍾國斌就話好難去估計邊個做，直言「香港又有，旺角又有，點樣估？」通街都有嘅時候，除非有天眼影到，唔係就唔知邊個做，「乜人都有可能」，件事已交畀警察去處理。
警方回覆查詢時指出，警方接報到場後，認為不涉及刑事成分，案件列作投訴滋擾處理。
