英超 ｜哥迪奧拿警告曼城：「球隊要減人，唔減我劈炮！」
曼城今屆四大皆空，正常嚟講，主帥應該要求球會管理層增兵，但哥迪奧拿卻反其道，已向曼城表明，若今夏不縮減球隊陣容規模，他將劈炮辭職。
本港時間周三凌晨曼城以3:1擊敗般尼茅夫，有多名一隊球員未能入選大軍名單，令哥迪奧拿感到不滿，侯辛洛夫（Abdukodir Khusanov）、沙維奴（Savinho）、占士·麥亞堤（James McAtee）和路易斯（Rico Lewis）只能坐視隊友贏波，反映出曼城擁有極深的板凳深度，但哥迪奧拿一向偏好操控規模較小的陣容。
「我已向球會講清楚，我唔要人數過多，唔想將五六名球員放入冰箱，我唔要咁樣。我只要名單精簡，將球員困在看台，連參賽機會都冇，我的心靈受唔住。今場就係臨時有人歸隊，所以發生呢個情況。」
「有三、四個月時間，我們甚至湊唔夠十一人出場，後防根本冇人可用，係好困難，但依家球員逐步回歸，下季絕對唔可以再出現同樣情況。作為教練，我無可能訓練24人，但每次揀人就要留四、五、六人留在曼徹斯特屋企唔使踢。呢種事我接受唔到，我已同球會講明。」
為了應對季中多名主力傷出，曼城於一月斥資逾兩億鎊引入四名新兵，加強陣容競爭力。迪布尼（Kevin De Bruyne）將於今夏約滿離隊，而格利殊（Jack Grealish）的未來亦充滿不確定性，將於季尾作出檢討。
而金球獎得主洛迪（Rodri），自從去年九月遭遇前十字韌帶（ACL）重創後，終於首次復出為曼城披甲上陣。
