【星島日報報道】今時今日要喺香港做財務公司（俗稱財仔），生意真係唔容易，金管局出招愈出愈辣，好似想趕財仔入絕路，所以佢哋都要諗吓計先得。好似易還財務（8079）就諗到做埋韓牛批發生意，希望可以殺出一條血路。
易還財務旗下全資附屬公司俊興冷凍食品，早前同韓國政府傾掂數，獨家代理濟州島韓牛，仲搞埋網站「韓牛速遞」方便客戶訂購。
唔講唔知，韓牛相當矜貴，本身喺韓國已經好少見，更何況出口外國呢。所以就算俊興今次拎到獨家代理權，每日都只可以從韓國運送到一隻經屠宰嘅韓牛到港。目前為止，已經約80間高檔餐廳訂咗韓牛。
易還財務主席蕭若元（圖右）就話，現時易還財務要「兩隻腳」發展，一方面繼續搞貸款業務，另一方面就做批發，包括批發冷凍食品、日用品同網購零售等。蕭若元早前提過想喺退休前將易還財務賣盤，但佢噚日就話，暫時無人想買。咁當然要拉上補下，搞埋凍肉生意幫補吓啦。佢仲計劃遲啲將批發業務分拆喺創業板上市。
