【譚炳文逝世】配音長青樹 經典聲演作品數一數 最入腦係叫人「唔好食煙」

資深藝人譚炳文（炳哥）今早因肺癌離世，享年86歲。炳哥除咗幕前演出之外，最為人熟悉嘅應該係把聲，因為佢多年來參與唔少配音工作，今年5月先同TVB配音組續約，近年仍然有唔少動畫同劇集由佢配音，經典之作多不勝數。

神探俏嬌娃

查看相片

70年代電視台購入美劇，唔止喺英文台推出，亦會以配音版俾中文台播放。《神探俏嬌娃》(Charlie’s Angel）故事耳熟能詳，三位靚女主角為查案出生入死，背後大老闆Charlie只見其聲不見其人，演繹相當有難度。每集尾段Charlie都會打電話聯絡三位天使，一句「Hi, 三位靚女」令觀眾留下深刻印象。

包青天

查看相片

90年代台劇《包青天》收視高企，香港兩間電視台先後購入，率先播放嘅亞視搵炳哥為主角包拯配音，將包公威武、仁慈及正直的角色特質呈現，深入民心。往後多套《包青天》或有包拯出場的劇集，都由炳哥幕後發聲，一下「鍘！」霸氣盡展。

IQ博士

查看相片

炳哥配過嘅動畫多蘿蘿，入屋嘅應該係《IQ博士》嘅「宇宙大王」，以諧趣語氣扮演傻氣外星人。近年有便利店換領IQ博士產品，個廣告都係搵炳哥配返「宇宙大王」！

美國癌症協會－尤伯連納忠告

查看相片

80後集體回憶，美國影星尤伯連納因肺癌逝世，臨終前忠告世人唔好食煙。短片香港版本由炳哥配音，尤伯連納碌大隻眼加上炳哥以沉厚聲線認真咁講「唔好食煙，千祈唔好食煙」，的確好有阻嚇性，而家睇返都驚驚地。炳哥話，因為呢個作品太深刻，接少好多廣告配音。