【姿色中環】「香港家陣就是通縮！」（Samantha）
「香港家陣就是通縮！」上周有位經濟分析師斬釘截鐵咁講。Samantha自認是名淡友，但也被這種論調嚇親，「我覺得身邊的人是太樂觀」。本港經濟去年初開始放慢，四月大時代式升市蓋過這事實，不幸地這個泡沫3個月後引爆，至於最後的堡壘失業率（現時是全民就業）捱得幾耐？Sam在周末逛完本港兩大購物點後，也樂觀不來！
Sam主要睇三樣野：吉舖，潮舖和食肆。尖沙咀一個潮流商場，一層近半吉舖，執起件衫望望，平咗，銷售員個面口，好咗。第二，曾被譽為「港女最愛」首飾店，去年門外排晒隊，今年則要拍烏蠅。正所謂民以食為天，唔買野，但總要食掛？去年有間以廚神招徠的西餐廳，冇訂位根本唔使去，上周末晚飯時段完全唔使等。
影響本港市道，除了中國經濟減慢這些陳腔濫調之外，還有匯率問題，與美元同步的港元，相較鄰近地區而言，點計都係貴。上周新加坡使出非常手段，唔畀坡元升值，為亞洲國家的貨幣戰揭開序幕，當其他地區貨幣越鬥越平，無論中外旅客，計過條數都會去啲「襟使」既地區。
本港無論經濟或是股市，都有機會出現陰乾式下跌局面，曹Sir說過：有懷疑揸現金。業績期剛完，想進取啲揀啲淨現金、冇負債、派高息的公司爭回報也是一個不俗的選擇，是日推介集齊上述三項特點的利亞零售（831）。
利亞零售上月派的業績，驟眼睇沒太大亮點，核心經營溢利為1.62億元，按年跌8.3%，主要源自租金和勞工成本上升，以及「指點」FingerShopping.com之經營開支增加，毛利率跌0.7個百分點至33.9%。但望真啲，它的防守性超強，淨現金5.68億，無任何借貸，在本港經濟放緩下，便利店同店增長仍錄7.3%。
值得留意的是，便利店具有抗逆能力，就算通縮，方便二字仍有價有市，據本港統計處，超市類別（包括便利店）銷售額按年增1.3%，再者，OK便利店近年成功建立品牌，先後有LINE公仔、熊本熊和蛋黃哥的換購推廣，有望突圍而出，加埋計及本港各區租金下調趨勢能減輕成本。唯一隱憂是，該公司推出的電貿平台「指點」暫未扭虧為盈。
劣市而言，食息對投資者而言無疑是最美味的餸菜，利亞零售出售便利店派發特別息6仙，全年派息22.1仙，有7厘息，加埋淨現金的狀態，獲得安本環球青睞，以均價2.7元增持384萬股，涉資逾千萬元，值得吸納。
