網民熱話：譏諷乘客如皇帝 空少唔專業捱轟

【on.cc東網專訊】所謂一樣米養百樣人，顧客可能有一百樣要求，但何謂專業服務，就要考考從業員有多大忍耐力和應變能力。有空中少爺博客在Facebook專頁撰文，尖酸諷刺乘客在飛機的行為如皇帝，變成手殘、腳殘和腦殘，例如將行李搬上行李櫃要人幫、去廁所搞到周地濕晒、廁所垃圾桶堆滿垃圾等。「一起飛就問有得食飯未，你估你搭私人飛機？我淨係煮畀你一個食好唔好？」結果引起網民批評，認為貼文者怨言多，公開刻薄批評客人，毫不專業。

有常以空少身份在網上講航空秘聞或旅遊趣事的博客，昨日(6日)在fb專頁以「點解？啲客上到飛機之後就會變曬(晒)低能？」為題貼文，指乘客平日可以自理，「但係點解你地(哋)班人，一上到機就好似變左(咗)手殘腳殘腦殘？」譏笑乘客低能，拿着登機證都行錯座位。

乘客要空中服務員施以援手，他則譏諷乘客手殘：「上到機，又會突然手殘無力，連自己件行李都搬唔到上行李櫃要人幫，咁你又帶咁多野(嘢)上機？男人老狗連樽蓋都扭唔開俾(畀)個樽我開，杯野(嘢)橙色當然係橙汁唔通俾(畀)啲屎汁你飲咩？」他亦對乘客弄污廁所及亂點餐感不滿。

貼文者以嬉笑怒駡方式道出不少乘客行為，一天得到400多個網民讚好或哈哈笑，但亦惹起網民炮轟貼文者侮辱乘客，認為乘客行去廚房飲水會阻礙空中服務員工作，更有網民指斥，「所以以後搭飛機淨係可以坐係(喺)個位度，飛機餐唔好食，廁所唔好去，總之所有會麻煩到空姐/空少既(嘅)都唔做得，你講到咁，不如唔好番(返)工啦，架飛機要你黎(嚟)做咩？」

網民有話說

P Man Ho：平時覺得好有共鳴，今日個po好似刻薄咗

Manley Lau：其實你好似禁吾(唔)中(鍾)意份工，禁(咁)多怨言有冇諗過份工系吾(唔)岩(啱)你。

Daniel Choi：最好d客上到機服待返你啦

Shing Lai：睇完個post我只會覺得你係一個唔專業既(嘅)空中服務員，行內討論無問題，公開咁講只令人更唔尊重你地(哋)

※緊貼網民熱話，掌握最熱話題，請關注網民熱話fb：

http://on.fb.me/1L3m1ro