臥底嬌娃｜李海銅藝訓班「班花」背景曝光 點名陳瀅感激對方照顧
更新時間
TVB劇集《臥底嬌娃》正熱播中，劇中飾演陳瀅同居好閨密嘉盈嘅李海銅因仙氣外表與自然演技成功彈出，昨晚（16日）劇情主要交代李海銅與神秘男友潘奕風（馬貫東飾）嘅相遇，講述兩年前，剛潛入二世嘅潘奕風透過投訴洗衣店意外結識到客服李海銅；某天收數時發現目標恰巧係李海銅嘅鄰居。李海銅替潘奕風照顧嫲嫲，喺嫲嫲加持下，二人關係變得親近及後相愛。李海銅喺昨晚戲份超多，備受網民關注，認為佢表現相當亮眼。
李海銅入行前任職證券公司結算，表示因為每日對住電腦太悶，又喺巧合之下接觸到幕前工作，發覺自己充滿戲癮，於是喺2023年毅然報讀第32期TVB藝員訓練班，喺修讀訓練班期間有「班花」之稱。李海銅曾經拍攝過《逆天奇案2》隔籬茶餐廳太子女、《反黑英雄》施暴MK妹、《新聞女王2》中SNK實習生楊詠欣等角色，令觀眾留下深刻印象。李海銅又曾於去年TVB台慶「光影傳承•薪火對話」環節中獲安排單獨表演，高海寧亦寄語李海銅勉勵佢，可見TVB有意栽培李海銅，上位有望。
廣告
李海銅坦言拍攝《臥底嬌娃》時僅剛入行兩年半，直言收到劇本後，見到自己有咁多戲份受寵若驚，感激方駿釗監製畀機會；又指開工初期好緊張，一聽到roll機內心就有啲震，幸好監製、導演及所有對手都好好，不但冇畀壓力佢，仲會提點佢。李海銅特別點名陳瀅，表示陳瀅就好似一位大姐姐咁照顧佢，當佢緊張時，陳瀅都會拍佢膊頭叫佢放鬆啲，又好有耐性咁同佢對戲，為人非常友善。
