何依婷（Regina）與圈外男友Cedric於2023年結婚，去年12月宣布懷孕5個月喜訊後專心養胎，今年4月誕下B女，升呢做靚媽。日前，何依婷為有份演出嘅TVB 劇集《執法者們》出席宣傳活動，接受傳媒訪問時表示照顧BB比想像中難得多，感覺全日都好忙，幸得老公幫忙，更大讚佢係「神隊友」。有網民就認為何依婷對腳比以前粗壯咗好多，何依婷亦坦言現在體重較產前相差約10磅，不過，表示自己唔會刻意節食，認為健康最重要。近日，何依婷與社交平台分享早前喺月子中心坐月嘅影片，食好住好，令網民驚嘆原來坐月都可以咁豪華。

何依婷表示與老公係育兒新手，好彩有月子中心嘅幫忙，寫道：「輕鬆愉快度過月子，生活慢慢重回正軌，期待Baby R一天天健康成長 。」何依婷入住香港一間月子中心，表示月子中心安排專車從醫院接送，又準備晒所有嘢，包括BB衫和BB用品：「直接帶個人入住就可以啦。」入住期間，就有護理師24小時一對一照顧佢和BB，BB沖涼洗頭都有專人幫忙，房間內亦設有薑水畀何依婷洗手用，又安排浸腳以及中醫把脈調理身體。

飲食進補方面，月子中心聘請米芝蓮大廚炮製月子餐，每日餐單由營養師按照何依婷身體恢復狀況而制定，每日食足6餐，包括豪食花膠、鮑魚等高級食材。另外，何依婷表示每日都會做Facial同做機幫助產後減脂同修身，月子中心仲有一對一嘅教練去指導適合嘅瑜伽同運動幫佢回復身材，要運動後如果想洗頭就可以直接躺平由護理員幫忙洗頭，喺呢28日坐月嘅時間，就連何依婷自己都形容為：「簡直係女王級嘅享受。」

據悉，月子中心提供28天、42天及56天套餐，收費高達328,800元起。唔少網民都留言表示「有錢真好」，同時大讚何依婷好幸福：「科技越進步，媽咪越幸福」、「香港都有咁high end嘅月子中心好正呀」、「好似真係唔錯」，不過就有網民直言：「你這不是只有上等人先買得起的服務嗎？」又有網民質疑月子中心嘅照顧：「Regina唔係餵人奶？食花膠會塞奶喎」、「抱住個bb 喺洗手盤邊抹頭就不夠細心，也許要裝好水在盤，坐定定咁抹比較安全。」