向華強拍片交代遺產由新抱郭碧婷管理 兩個仔每月收生活費 : 唔想向佐搞小三小四
座擁電影王國嘅向華強同太太陳嵐，曾經拍片分享對兩個仔向佐同向佑嘅睇法。估唔到向生向太連遺產分配都拍片交代！向生尋日上載影片到小紅書，表示同太太都同意將遺產交俾大新抱郭碧婷管理，並成立一個家族基金。而向太一向鍾情嘅珠寶，同樣會先留俾郭碧婷，然後再傳俾孫女咁傳承落去。
對於兩個仔，向華強直言「都看著辦吧」，而且佢地對財產分配事前並不知情。向華強提到，唔將財產俾向佐同向佑，直接跳過留俾2個孫。向華強指向太認為兩個仔唔適合處理錢財、容易受騙，財產可能「沒多久就給人騙走」。向生又感嘆佢同向太咁精明，點解2個仔咁容易俾人呃，因此寧願成立家族基金由郭碧婷管理，每個月為兒子提供生活費，「他們不餓死就行了，就不要搞別的，搞什麼都不行」，同時亦唔想向佐同向佑覺得有遺產就可以咩都唔做，並警告兩個仔唔可以躺平，否則連每個月的生活費都冇。
向華強話好喜歡兩個孫，但因為向太唔喜歡美國，因此要求啲孫唔可以去美國讀書甚至移民，否則取消繼承權。向華強對郭碧婷同樣讚不絕口。「郭碧婷是很會守財的人，非常會處理、不浪費，我跟向太都很放心」，而且相信新抱會將啲孫教得好。
向華強交盤數俾郭碧婷原來仲有一個原因，就係唔想向佐搞小三小四，郭碧婷揸數向佐自然會對老婆好。向生又爆細仔向佑一直對父母財產分配有微言，認為唔公平。向生向太同向佑要破冰似乎有難度，因為向生自爆太太甚至已經喺微信「拉黑」向佑，向生要搵秘書先聯絡到細仔，而且寧願同孫女每日視像通話，甚至向佑想同父母溝通都反而被拒。
向生強調咁做呢份遺囑係向太對郭碧婷信任，但亦留一線話遺囑隨時可以改，如果兩老夠長命，10年後2個仔表現好嘅，話唔定會改。最後向華強語重心長咁話「遺囑可以先立，可是財產不能先分。分之前兒子是兒子，可是分了以後兒子可能是老子」。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
