吳啟華豪擲千萬掃大灣區六單位

吳啟華近年愛投資磚頭保值，最近更睇準大灣區的高速發展，一口氣狂掃六個單位作投資，斥資近千萬元。他透露是買樓花，祈求後年能順利收樓，不要爛尾，因他試過投資失利，損失六位數字！


最近不少人喜歡投資大灣區地產，有指藝人吳啟華、何家勁早前掃了多個單位，記者就此事向吳啟華求證，他說：「係，買咗樓花。（恭喜晒喎！）恭咩喜，都擔心會唔會爛尾o架，老人家都要做吓呢啲投資，如果唔係啲錢好快使晒！」


「姨媽姑姐都有買」


問總共掃了幾多個單位？他笑言並非全數是他的：「我啲屋企人、姨媽、姑姐都有買，話全部係我買，但其實唔係，大約買咗六間左右，160萬一間。（幾時收樓？）應該係2020年初，發展商都幾好，我哋依家等於畀錢佢哋起樓。」


對於有指大灣區地產具升值潛力，他十分認同：「係呀，有高鐵，發展得好犀利，依家我哋買嘅係叫政府限價盤，政府限咗唔能夠高過幾多錢，同埋三至五年內唔能夠轉讓，到可以賣嘅時候，我會再睇吓點。好多嘢好難講，但地產最穩陣，我覺得是但喺內地買層樓擺幾年都會升，有時仲會升到一個開。（做樓王喎！）我呢啲邊度係，任達華就係。」不過，投資樓花當然有一定風險，他亦笑言：「依家都求神拜佛，希望個盤唔好爛尾，準時交樓，呢啲嘢真係好難講，以前買樓都唔係未試過爛尾嘅情況，我都瀨過一次嘢o架喇！」


當年買舖蝕廿萬


問到「爛尾」事件，他回憶說：「都十幾年前，當時內地公司搵我哋拍戲，拍完戲又話公司有搞商場舖，叫我哋內部認購平畀我哋，我咪將啲片酬拎去買舖，點知最後就爛咗尾走咗佬，間公司冇咗、咩都冇晒。（損失幾多？）當年20幾萬左右。」