TVB資訊節目《東張西望》近年報導唔少社會時事及民生議題等議題，獲得大眾關注。前晚（24日）起一連兩集揭發一單令人震驚嘅戀童案件。一名母親（陳媽媽）向《東張西望》講述年僅14歲仔仔疑遭成年男教練（J教練）誘騙發生不當行為嘅事發經過，當中涉及猥褻對話及疑似性侵行為。
事源喺2025年5月，陳媽媽指14歲仔仔同朋友去教授某種運動嘅工作室遊玩，估唔到之後就開始出事。仔仔唔需要付費就有人教授某種運動，仲會幫佢補習，陳媽媽覺得困惑嘅同時，學校老師亦有致電提醒，表示有一個金頭髮嘅男子去學校接仔仔放學，指佢唔係呢區嘅人。
自此陳媽媽開始留意仔仔嘅電話，結果喺檢查手機時發現J教練同仔仔講出大量奇怪及猥褻嘅對話，J教練更向仔仔表白，不過就淨係想有性關係，初頭仔仔係拒絕，並表示自己唔係鍾意男性，不過J教練並冇放棄，反而話要去追求並游說仔仔。之後陳媽媽都會檢查仔仔嘅電話，發覺仔仔開始懷疑自己嘅性取向，而J教練更越講越露骨，甚至有一啲配上淫褻文字嘅圖片。
陳媽媽隨即同老公商量，不過好快就發現仔仔嘅定位出現喺一間時鐘酒店，佢哋即刻分頭趕去現場，不過仔仔嘅定位已經去咗附近一間餐廳。佢哋見到仔仔同J教練搭住膊頭喺食肆行出嚟，之後去咗尖東地鐵站徘徊及坐咗喺月台傾偈，臨別嘅時候仔仔同J教練有幾個goodbye kiss，令陳夫婦無法接受。
去到第二日，陳媽媽帶同知道嘅嘢去報警，不過發現J教練教導仔仔點樣應對警方嘅查問，更兩次發現仔仔嘅內褲有奇怪污漬。後來，陳媽媽再發現仔仔嘅定位出現喺尖沙咀某某大廈，佢問仔仔去某某大廈做咩，仔仔竟然回答係開房。
喺J教練同仔仔嘅對話，只係不斷睇到對方催逼仔仔同佢進行親密行為，陳媽媽覺得事態嚴重，所以直接搵J教練攤牌，要佢遠離仔仔。喺見面時，J教練承認自己有做錯過，並同意慢慢做返普通朋友，但事實上就冇。同時，陳媽媽發現J教練成日用命令口吻同仔仔對話，及對仔仔同學有興趣，希望可以「三人行」，當J教練得知同學收一千蚊可以同玩一次，J教練竟然回覆話12歲先有資格開呢個條件，佢甚至承認自己有戀童癖。而仔仔驚被社工知道呢段關係，甚至同J教練講唔想返學。
絕望嘅陳媽媽為拯救仔仔，千方百計搵到J教練嘅父母要求介入，J教練嘅父母亦有向佢道歉，二人雖然表面答應絕交，不過其實仲有藕斷絲連。其後J教練表示如果想佢講出真實想法，佢哋要刪除所有證據、簽字唔會追究及簽佢成為仔仔嘅合法監護人。
女主持甘詠寧先後嘗試致電及到J教練屋企搵人，最後《東張西望》攝製隊成功打聽J教練外遊回港，所以前往機場等候並成功發現J教練身影。甘詠寧向J教練問出多條問題，不過佢都話冇回應，當被問到係唔離間佢哋母子關係時，佢就話「根本冇呢種事，我無啦啦去離間嚟做咩呢？我就咩得著呀？」再經追問下，J教練先話佢哋冇一齊，及表示而家搞到咁，唔知會唔會再聯絡。
之後，J教練喺機場狂奔，甘詠寧亦落力嘗試追上，可惜追唔上。報道出街後，唔少網民紛紛留言鬧爆J教練行為，及留言大讚甘詠寧，例如「甘寧追人.....好想俾佢追」、「東張女主持咁搏老命」、「東張個記者追住佢 好落力 但真係要小心 驚條友變態唔知會做乜」、「Respect 甘」及「甘詠寧好盡責……真正追訪」等等。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
