湯鎮業前妻姜坤有百億名媛慶祝生日 情同姊妹仲一齊外遊

TVB 80年代「五虎將」之一嘅湯鎮業上月榮升做外父，愛女湯愛嘉同男友Alex拉埋天窗，仲舉行咗一場星光熠熠嘅華麗婚宴。湯愛嘉媽咪、湯鎮業前妻姜坤當日以一襲紅色晚裝示人，榮升外母但依然相當有氣質。

離婚後，姜坤生活仍然愜意，向來佢同名媛、永隆銀行創辦人伍宜孫嘅孫新抱伍葉靖怡相當老友。早前姜坤生日，伍葉靖怡就為佢賀壽，而且影相攬頭攬頸，伍太更喺社交平台留言「親愛的，生日快樂」，二人交情匪淺。姜坤IG較早時都post過佢同伍葉靖怡一齊去法國旅行嘅相，仲話係「開心二人世界」，簡直情同姊妹。

姜坤同湯鎮業於1993年結婚，二人婚後育有大女湯愛嘉同埋一對孖仔湯君慈、湯君耀，但湯鎮業同姜坤於2001年離婚收場。即使後來湯鎮業再婚，一共有6個仔女要供養，但姜坤曾盛讚離婚後湯鎮業對佢同仔女相當照顧，十分負責。姜坤曾經post過家居相可見，佢屋企可以望到山頂凌霄閣，似乎位處半山高級位置。而早前湯愛嘉結婚，姜坤多位名媛好友都有出席婚宴。