金像獎 完整得獎名單 ｜《九龍城寨之圍城》奪最佳電影 共奪9獎成全晚大贏家

監製莊澄：「而家香法電影正處非常困難時期，尤其是年輕一輩，唔好放棄，堅持下去就會勝利，香港電影加油！」

古天樂：「唔想喺完結片尾時候先見到新人個名，嚟緊就由新人帶領香港電影走出新一步，呢個係我最想講。」

監製陳羅超：「可以繼續入戲院，繼續聽廣東話係好幸福嘅事。」

最佳電影：九龍城寨之圍城

關錦鵬導演、許鞍華導演頒發最佳導演獎。

最佳導演：鄭保瑞（九龍城寨之圍城）

劉嘉玲一上台，已被台下叫：「又係你嘅？」她就指自己被主席叫來頒最佳男主角：「我的確對最佳男主角眼光獨到，嚟緊呢幾年都係我負責頒，所以你哋班後生仔，記得叫聲嘉玲姐！」

劉青雲：「今日John哥坐係度我好開心，好多前輩係度，如果你哋唔喺度，我就係前輩㗎喇！《爸爸》令我以為好多嘢我知道，原來我都唔知道。《爸爸》嘅導演唔好喊啦！多謝太太，特別特別多謝爸爸（感觸），多謝嗰一位爸爸！」

最佳男主角：劉青雲（爸爸）

吳彥祖、曾國祥現身，吳彥祖：「我唔想係呢5位咁優秀嘅女演員身上，見到失落嘅表情。」曾國祥表示，其實沒提名者更失落，吳彥祖：「你係咪講緊我呀？我咪冇提名囉？」兩位久未於香港露面仍不失幽默。

台下朱栢康比衛詩雅哭得更厲害，衛詩雅：「阿哥，我哋得咗喇！多謝屋企人、爸爸媽媽、老公，多謝你哋畀我咁安全嘅堡壘，畀我去追夢。多謝咁多年用過我嘅導演同監製。多謝陳茂賢導演，係我自己要放棄嘅時候，你冇放棄我！」並感激一眾《破。地獄》團隊。「不如好好珍惜呢程車嘅每一個畫面，我好幸運遇見呢程車上每一位，今日呢個鼓勵會令我不斷鞭策自己，我係演員衛詩雅。」

最佳女主角：衛詩雅（破。地獄）

陳法拉、張家輝以《贖夢》造型現身，投入戲中角色！張家輝：「鍾意電影嘅個個都癡線架！」陳法拉更犧牲靚樣，非常破格。

陳茂賢：「多謝老闆楊受成博士，多謝你畀我開一部咁冷門嘅戲，多謝一眾奮不顧身嘅演員，呢套戲係我人生比較差嘅時候寫，梁雍婷、朱栢康，你哋係我身處地獄嘅時候拉我上嚟，多謝帶我入行嘅王晶導演、亦師亦友嘅谷德昭導演。好多人話一生人等一個角色，但編劇一個角色都等一個人。好多謝衛詩雅小姐，因一句說話就練咗一年破地獄。」此時台下的梁雍婷、衛詩雅已哭成淚人。

最佳編劇：陳茂賢、鄭緯機（破。地獄）

最佳原創電影歌曲：普渡眾生（破。地獄）

作曲、填詞、主唱：林家謙

岑寧兒、謝雅兒兩位音樂人首次頒獎，頒發最佳原創電影音樂獎。

最佳原創電影音樂：朱芸編（破。地獄）