操盤手札記│對等關稅拆招 自減稅率「攬減」（割柑人）
明日就踏入4月，係春色多變嘅天時。人間4月天，上世紀係徐志摩、林徽因、陸小曼、張幼儀、梁思成、金岳霖等人，感情糾葛嘅日子；如今則係特朗普同各國元首，仲有捲入政治旋渦嘅李嘉誠等人，利益糾葛嘅日子。市場高度戒備，4月2日（本周三）就係美國對所有貿易夥伴徵收「對等關稅」嘅生效日，亦係對所有外國製造汽車徵收25%關稅嘅生效日；兼係李嘉誠旗下長和（001）原訂賣巴拿馬碼頭簽約之日（但據傳媒收風，本周唔會如期簽約）。
市場憂慮通脹重燃經濟轉差
關稅實施前仍有變數
雖然距離貿易關稅全面開戰只剩兩日，但美國總統特朗普慣以「極限施壓」作為談判手段，關稅實施前仍有變數；不過，市場對關稅引發通脹重燃、損害企業盈利、損害經濟增長嘅憂慮加深。事實上，美國上周五公布嘅多項經濟數據出乎意料，聯儲局重視嘅通脹指標核心PCE，2月按年回升至2.8%，按月再升至0.4%，都高過預期；另外，消費者信心指數終值下修至57，則低過預期。美股道指、標指、納指分別跌1.7%、2%、2.7%；追蹤中概股嘅金龍中國指數跌3.1%。
關稅戰開打，各國點應對？報復？讓步？截至執筆之時，部分國家反應如下——墨西哥：正在制定應對措施；加拿大：正在研究報復措施；德國：敦促歐盟強硬回應；法國：敦促歐盟採取反制措施；歐盟：着手起草「條款清單」（Term Sheet），列出可談判領域；日本：擬放寬美國貨進口換取豁免；南韓：經官方及民間渠道協商；印度：削減過半美國貨稅率換取豁免；越南：削減液化天然氣、汽車等美國貨稅率。印度、越南反其道而行嘅做法，喺對等關稅前提下，可謂「攬減」一着。
美國對華關稅有直線有曲線
至於中國，特朗普上周三話，願意降低對華關稅換取中國批准字節跳動賣TikTok。TikTok「不賣就禁」法令原本1月19日到期，但特朗普寛限至4月5日，仲話可再延期。特朗普此舉，被視為向中國示好；不過，中國外交部回應時重申反對加徵關稅。美國貿易逆差最大嘅國家係中國，上年達2,954億美元，打關稅戰，點會放過中國？稅率又降得幾多？其實美國對中國除咗直線徵關稅，仲曲線徵關稅，繼早前向墨西哥、加拿大施壓對中國徵稅換取美國放生後，日前又話向購買委內瑞拉石油及天然氣嘅國家加徵25%關稅，矛頭直指最大買家中國。中槪股指數跌得甘過美股三大指數，不無原因。
