【東方日報專訊】新民主同盟早前喺立法會選舉全軍盡墨，失去唯一嘅立法會議席後，再爆區議員跳船！曾經代表該黨出選超級區議會嘅沙田區議員許銳宇尋日突然喺facebook上話，即日起退出新同盟，從此以後只為自己做嘅事情負責，又話「今後會活得更像自己」，講到好似「脫苦海」咁。
許銳宇稱與黨友唔夾
計埋許銳宇，新同盟兩個月之內已有四個區議員退黨，究竟係乜嘢原因令新同盟留唔住人呢？
據了解，許銳宇係日前透過WhatsApp通知退黨，主要原因係不滿新同盟喺立法會選舉嘅部署，同埋喺地區上亦同黨友唔係咁夾，佢本人都曾經喺fb為呢啲事而大吐苦水，終於上星期尾爆發宣布退黨。該黨召集人鍾錦麟接受查詢時就話，上星期五收到許銳宇對地區工作分工上嘅意見，佢前日曾經去咗許喺新翠邨嘅辦事處見面。佢又承認許曾經提出退黨申請，而該黨正積極挽留。
繼早前喺立法會選舉當日倒戈支持鄭家富而要退黨嘅丘文俊、趙柱幫同陳兆陽之後，許銳宇係第四個退黨嘅區議員，亦令該黨喺沙田區嘅區議員驟減至一人，該黨嘅領導層係唔係應該作出檢討，否則走吓一個、走吓一個，距離亡黨之路不遠矣。
