舒適堡結業︳郭富城成代言生招牌廿幾年 徐子淇都拍過廣告

連鎖健身公司「舒適堡」宣布，今日（6 日）起「暫時全線結業」。舒適堡稱有新投資者承諾，會為客戶提供餘下的健身卡及美容服務。舒適堡在官方網站發出通告，指四年新冠疫情後，雖然香港經濟環境逐漸改善，但若干分店的業主仍維持高企租金，舒適堡將於 2024 年 9 月 6 日「暫時全線結業」，以待重整業務。

舒適堡在港經營38年，可以話係香港首批大型連鎖健身室，多年來一直有搵藝人拍廣告宣傳。早於1991年，舒適堡已經搵港姐何婉盈演出廣告。到2000年更加搵到而家貴為「千億新抱」嘅徐子淇拍廣告。近年主持《無窮之路》而喺內地打出知名度嘅陳貝兒同樣曾經為舒適堡嘅廣告節目做主持。

當然最為人熟悉嘅舒適堡代言人一定係郭富城，雙方合作超過20年，舒適堡更曾經成為城城演唱會冠名贊助商。