政情：為見游蕙禎 實習生肯白做
【東方日報專訊】暑假將至，一眾政黨政團都招募唔少實習生，睇睇有冇機會培養佢哋成為政壇生力軍。其中民主黨（白鴿黨）嘅實習生人數最多，超過一百三十人報名，至於本土派政團青年新政就收到四十多份申請，當中有七人獲聘。聽聞唔少應徵者都話，為咗可以見女神游蕙禎一面，無償加入青年新政做苦力亦在所不惜，女神果然魅力非凡！
青年新政召集人梁頌恆表示，今年請咗七個暑期實習生，包括香港大學學生，其中一人獲派去九龍城區議員鄺葆賢辦事處幫手，另外幾個就去其他地區工作，佢希望透過實習計劃可以成功「揀蟀」做接班人。他又話，雖然實習生只有二千元車馬費，但都有不少人申請，問到實習生係咪為咗可以同游蕙禎一齊工作，無車馬費都無所謂，梁頌恆就笑而不語。
至於泛民政黨，就以白鴿黨實習生人數最多，有超過一百三十人報名，預計會全數接收；而該黨實習生時薪達五十元，平均工作一百六十小時，有機會同立法會議員及區議員實習。另外，公民黨就有廿九個實習生，平均工作一百八十小時，會有二千元車馬費。
