37歲陳嘉欣2011年加入無綫新聞出任港聞記者，晉升機會不斷，加上近年好多主播相繼離開，令佢穩坐「一姐」之位。不過，陳嘉欣喺早前報導新聞時口誤「警員」一詞，引起軒然大波，遭唔少網民圍剿。

陳嘉欣上周五（4日）報導西營盤第三街毓明閣被圍封新聞，一度口誤將「警員」讀成「警遠」，有網民聽成「警犬」，並指陳嘉欣完場時仲陰陰咀笑，惹起網民喺唔同平台留下大量負評：「炒左佢，好明顯有意讀錯」、「一個字就是：炒，見一個炒一個，絕不能放過一個」、「新聞工作者把自己政治立場，個人情緒放入工作中，好唔專業」等等，亦有部份「撐警」YouTuber發起聲討，同時網絡上亦有人發起一人一信向無綫電視及通訊局投訴，指陳嘉欣此舉動有悔辱公職人員之嫌，要求嚴正處理，誓要無綫電視將佢「豉椒炒魷」。

有網民就發現陳嘉欣早於2019年犯同樣口誤，不過當時通訊局裁定投訴理據不足了事；有網民幫口指可能係發音唔準，但亦有網民直言「員」同「犬」發音差別大難有口誤，質疑陳嘉欣新聞報導員資格。陳嘉欣加入無綫新聞咁耐以嚟備受重用，2016年獲晉升為總記者，亦係歷來首位總記者，兩年後再次獲晉升為助理採訪主任；2018年拍攝無綫新聞部宣傳片，只有陳嘉欣有對白，就連當時嘅首席主播張文采都只係企喺後面，可見地位超然，未知呢次再次發生口誤事件又會唔會影響陳嘉欣喺無綫新聞嘅地位呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！