解讀 | 歐聯八強前瞻：巴黎聖日耳門 對 阿士東維拉

牌面上大家可能會睇高巴黎聖日耳門一線，但係大家唔好忘記，阿士東維拉領隊艾馬利絕對係歐洲賽其中一位最出色嘅戰術大師。

今次對碰花生味道濃厚，呢位53歲教頭亦會聯同阿辛斯奧首次喺正式比賽上演倒戈大戰，令人引頸以待。

雖然阿士東維拉今季表現唔算穩定，但係自從佢哋喺冬季轉會窗一口氣簽入馬倫、華舒福同阿辛斯奧之後，大大加強咗球隊實力。而呢三位球員當中總有一位，能夠喺球隊近4場各項賽事取得入球，協助維拉錄得近7場各項賽事不敗走勢。不過馬倫今仗未能出戰聖日耳門，因為維拉二月嘅時候，並無註冊到佢喺歐聯大軍名單之中。

維拉今季嘅攻勢集中晒喺左路，各項賽事有37%嘅進攻觸球都係嚟自左路。雖然華舒福表現有啲下滑，但係領隊艾馬利絕對可以要求球隊踢得更加直接，以瓦解對方前場壓迫。

而巴黎聖日耳門亦都十分擅長前場壓迫，球隊今季12場歐洲賽一共喺前場66次成功搶到對方腳下球，冠絕整個歐洲賽。雖然歐聯聯賽階段不敵阿仙奴同拜仁慕尼黑，但係由法比安路爾斯、域真亞同祖奧尼維斯組成嘅中場鐵三角越踢越好，技術層面出眾，攔截力十分強，亦能夠互相補位。

艾馬利絕對唔介意巴黎聖日耳向維拉作出一對一嘅前場緊迫，因為聖日耳門嘅把握力唔算高，十六強階段首回合利物浦擊敗聖日耳門一仗中就睇到，只要中堅或門將作出長傳，將皮球傳到翼鋒嘅腳下，就會取得一定甜頭。

預計維拉可以藉著高Q大棍直接踢法，憑著屈堅斯同翼鋒球員嘅邊路推進，再加上喺一對一面對對方中堅嘅時候取得優勢。而巴黎聖日耳門中前場搶到皮球後，能否立即製造到機會，轉化為入球亦成為勝負關鍵。