【星島日報報道】兩個月前，我十日之內連啃兩次「牛肉乾」，分別在早上八點及八點十分，泊在不阻街、不阻人位置，故條氣有少少唔順，在此寫出後，紀律部隊老友一查，即有答案。因為死在：一、旁邊有收費停車場，你唔畀生意佢做，可能打電話舉報；二、位置近校巴上落之處，此乃死罪。
明晒，抵死！咁，放 暑假又如何？小弟天天經過六月被抄位置，發覺整個七月中至八月中，從未見八點半前有車中招 。哈哈，原來抄牌都會「放暑假」 ，咁就要存記下來喇。
不過，踏入八月尾，隨着一所再一所學校開學，警察叔叔又開工 。朝朝晨運一段何文田常樂街，單 雙程，周不時兩邊泊滿車，搞到雙程變單程，令不少駕駛者MM聲，因有部分路段睇唔通對頭車也。咁搞法，當然不停有人打九九九啦。幸而，大家識做，總之，八點半前 走就冇事，無人想逼人太甚者，因大家皆知香港合法泊車位根本完全唔夠。午夜泊街邊，乃無可奈何。執法者亦顧及法理情，不會硬做醜人。
只是，大家留意，一旦開學，就唔係咁講喇。因為早上七點開始，已通街學生趕返學，黃色校車頻頻出動，呢個時候，你阻街亂泊，就冇情講！上周三小弟晨運時，已見警察姐姐「熱身」，八點正已在抄牌，一架衝鋒車跳下幾位軍裝，成排車全部中招，無一倖免。
另外，家居附近國際學校上周開學（因比普通學校提早放暑假），學生多有錢仔，不少由司機接送，送返學冇問題，接放學就死得。常盛街、常康街一帶，凡到下午三點就大量豪華七人車非法停泊等接人，呢班司機，十之七八話之其他人死，非法位雙黃 照泊，頂住附近大廈出入口。終於多次搞到先而口角，繼而動武。報警，更差不多屬日日指定動作，真真頭都大。
阿碌開咪 曾智華
專欄
