蘇永康自爆《越吻越傷心》先後被六位歌手拒絕
先後被六位歌手拒絕
蘇永康日前接受歌唱老師Calvin Sir張嘉銘的YouTube頻道《歌唱小教室》訪問，節目日前播出，兩人大談《越吻越傷心》一曲，康仔這首經典歌曲，於98年推出，原來吳國敬作了這首歌之後，曾經推介給多位歌手，但都失敗，輾轉由蘇永康取得這首歌。
蘇永康接受Calvin Sir的YouTube頻道訪問
康仔說：「98年初某一個晚上，我哋喺何超儀屋企，有個人推門入嚟，就係吳國敬，『梅姐彈咗我隻歌，彈第二次！』，我哋叫阿敬播嚟聽吓，有幾多人聽呢？有許志安、鄭秀文、陳奕迅，加埋我，仲有何超儀，五個人。阿敬話：『唔差吖嘛！』阿臣（陳奕迅）行咗出去，Sammi同安仔喺地下玩緊手指，超儀望住我，我話：『阿敬，我要啦！』我了解到，梅姐之前彈嗰個係陳慧嫻，我明白點解啲人會彈，就係啲字好密，我諗點處理呢？」
《越吻越傷心》由吳國敬作曲
「我唔係因為人哋唔要我要，前面嗰種密集，我聽一次都未記得晒，但有一句我記得，聽一次啫，咁我要啦。當時我諗，一定要寫一份好好嘅詞，不作他人想，就阿夕（林夕）。因為阿夕啲詞係好順，佢冇翹口嘅字出現過，幾十年嚟都冇。」即屈指一算，吳國敬作這首《越吻越傷心》，前後有陳慧嫻、梅艷芳、陳奕迅、許志安、鄭秀文和何超儀共六位歌手聽過，都沒要這歌，結果蘇永康獨具慧眼，揀了這首歌，最終成為他代表性的金曲。
蘇永康11月將在新加坡開演唱會
歷年來有這麼多歌手翻唱過蘇永康的《越吻越傷心》，康仔最愛張學友98年唱的版本：「唱呢啲歌好有趣，永遠都係隔籬飯香，學友咬字好intense（強烈），佢係偏向pop rock嘅唱法。」
蘇永康在樂壇多年，他對唱歌現在有另一番看法：
「我冇發現我任何嘅歌，尤其有啲年代嘅歌，有我好滿意嘅版本，因為呢啲歌，我現在一定唔會咁唱。最好嘅版本，永遠係未來，因為歌手不斷在進化中。我現在嘅發聲位置，都同以前好大分別，情緒都唔會一樣，以前版本係一個年代嘅印記。」
「我去到呢個年紀，我發覺音樂係less is more，簡單啲，純粹啲，比偏向多技巧好啲，因為我哋由好多技巧嘅年代走過嚟。」
另外，原來蘇永康一直也有留意Calvin Sir的頻道，他說：「你現在20幾萬訂閱，我睇你嗰陣，你未夠10萬。要俾返credit你，你對唱歌教學有你嘅想法，你講緊人話。」
———————————————————————
ENTER ENTER 是 ENTER into ENTERtainment，直入娛樂核心，娛樂不單是消閑，也可以認真去看，ENTER ENTER 會認真對待娛樂，看清娛樂。
Facebook link
https://www.facebook.com/enterintoenter/
IG link
https://www.instagram.com/enterintoenter/
Threads link
https://www.threads.com/@enterintoenter
