張致恒考獲平安卡去地盤開工被捕獲 網民：可以頂到幾多日？
張致恒（Steven）同老婆雯雯（區燕雯）喺2019年奉子成婚，婚後佢哋生完一個又一個，不過二人屢次傳出離婚消息，被網民指係「離婚界KOL」。雯雯經常喺網上數臭老公及呻窮，上個月仲自爆一家六口因欠租被業主趕走。Steven曾被雯雯指「又廢又懶」及藉口多多唔去見工，佢喺上月公布成功考獲地盤平安卡，而近日就已經開始到地盤工作。
張致恒喺上月公布成功考獲地盤平安卡：「終於有啦！有冇地盤即pay介紹。」原來佢近日已經開工，有網民仲上載Steven喺地盤工作嘅照片，並留言話：「努力工作吧，希望能堅持。」相片中嘅Steven戴上黃色安全帽，同工友有講有笑，似乎相處得唔錯。
有網民就留言為佢打氣，例如「加油啊，腳踏實地總歸是好的」、「只要努力工作賺錢養家就值得鼓勵」及「如果佢真係認真做好呢份工，值得支持下」等等；不過亦有網民唔睇好佢，留言話「咪玩啦，之前天水圍咪做左幾日冇做」、「可以頂到幾多日？」、「依家日日三十幾度，想知steven喺地盤捱到幾多日」、「想學Deep開地盤演唱會賺錢？」、「返到幾多日吖嗱」及「條友咁懶 做到一個禮拜都俾多」等等。
