爆一爆｜富豪私竇鼻祖 皇朝會秘聞（Louise）
本週一早上，一位舊行家分享一則新聞，正是王穎妤做咗「皇朝會」嘅董事，令市場引起想像。
美股外幣即時報價 多國新聞任睇
皇朝會會藉是身份象徵
「皇朝會」可以講係已故新世界創辦人彤叔嘅私竇。小妹有個死鬼老友，當年係孖士打律師行入面既師爺，彤叔搞灣仔會景閣時同政府有啲涉及地積比率嘅棘手問題，就搵咗呢位老友做「軍師」， 事後除咗支付豐厚法律顧問費外，仲醒咗個皇朝會會籍俾佢，老友至今引以為傲。
過去唔少「 擦鞋仔」對皇朝會會藉都趨之若驁，捨得俾一百幾十萬入會「投名狀」，希望去結識下大老細。而彤叔呢位私竇鼻祖亦睇通條攤路，1989年會景閣落成時，業主均獲贈皇朝會之會籍，當時香港大型屋苑仍未流行 Club House，彤叔認真高招，屋苑管理費收一筆，皇朝會月費又收一筆！不過當時皇朝會會籍乃是「彤叔圍內友」之身份象徵，又點會計較濕碎會費呢？
富豪鋤Dee會 唔係人人玩得起
皇朝會最為人津津樂道，係以彤叔為首的富豪鋤Dee會，不過每口100萬，唔係人人玩得起。昔日彤叔鋤 Dee 脚如大劉、煙仔何、岳少、張松橋（阿春）和許家印等富豪，都先後係皇朝會留低唔少腳毛。聽講有個同新世界做成單大刁嘅地產經紀老細，獲邀到皇朝會與甚有賭運嘅純官鋤Dee，誰不知輸到趴街，輸埋份經紀佣金俾純官，所以唔係咁容易行得埋鋤Dee會。
近年最經典既皇朝會事件，要數「錢多多」被拮大髀。馬雲旗下的螞蟻2020年上市撻Q後一個月， 佢老友錢峰雷（別名錢多多）亦係螞蟻嘅前期投資者，係皇朝會消遣完之後，係樓下被人用刀施襲大髀，觸發金融人士熱議。
其實王穎妤出任皇朝會非新鮮事，皇朝會中菜廳早已是王潁妤與家人的私家飯堂，其父即前法官王見秋（人稱王官）相約老友飯聚都在此，疫情期間則送上樓上會景閣享用，有位 Captain 名叫 Yorky專責照顧王官一家人食用。
近幾年類似嘅私人會所如雨後春筍，純官個女鄭志雯在尖沙咀 Rosewood 搞 Carlye Club，專吸年青才俊，個仔鄭志剛係新世界大厦內又搞個 Town Club，都追隨彤叔套路。
小妹有個死鬼老友，兩年前同小妹在皇朝會食晏時，話年紀老邁用唔到咁多會藉，謂可以平平哋以$15萬轉讓佢個皇朝會會籍予小妹，不過小妹有照鏡嘅，自己又唔係要請客食飯，搏乜呢？還是享用自己在中環，雖然要行條大斜路上嘅 Foreign Correspondent Club，啱自己身份多啲。
